Azərbaycanın xarici ticarət dövriyyəsi 20,1 milyard dollar olub
Bakı, 30 oktyabr, AZƏRTAC
Gömrük orqanlarında qeydiyyatı aparılmış, lakin gömrük rəsmiləşdirilməsi tam başa çatdırılmamış ixrac olunan xam neft və təbii qazın statistik qiymətləndirilmiş dəyəri nəzərə alınmaqla 2021-ci ilin yanvar-avqust aylarında xarici ticarət dövriyyəsi 20 milyard 100,1 milyon ABŞ dolları, o cümlədən ixracın dəyəri 12 milyard 750,6 milyon dollar, idxalın dəyəri 7 milyard 349,5 milyon dollar təşkil edib, nəticədə 5 milyard 401,1 milyon dollarlıq müsbət ticarət saldosu yaranıb.
Dövlət Statistika Komitəsindən AZƏRTAC-a bildirilib ki, 2020-ci ilin yanvar-avqust ayları ilə müqayisədə xarici ticarət dövriyyəsi faktiki qiymətlərlə 28,3 faiz artıb, real ifadədə isə 4,1 faiz, o cümlədən idxal 9,8 faiz azalıb, ixrac isə 0,1 faiz artıb. Dövlət Gömrük Komitəsindən daxil olmuş məlumatlara əsasən, xarici ticarət dövriyyəsinin 86,6 faizi İtaliya, Türkiyə, Rusiya, Çin, Almaniya, Ukrayna, Hindistan, İspaniya, Xorvatiya, Gürcüstan, İsrail, Birləşmiş Krallıq, ABŞ, Tunis, Portuqaliya, İsveçrə, İran, Belarus, Fransa, Yaponiya ilə aparılmış ticarət əməliyyatlarının payına düşüb. Ölkəyə idxal olunmuş məhsulların ümumi dəyərinin 16,8 faizi Rusiyanın, 15,4 faizi Türkiyənin, 13,7 faizi Çinin, 5,9 faizi Almaniyanın, 4,1 faizi ABŞ-ın, hər biri 4 faiz olmaqla İtaliya və Ukraynanın, 3,2 faizi İranın, 2,7 faizi Birləşmiş Krallığın, 2,3 faizi Yaponiyanın, 1,9 faizi Koreyanın, 1,8 faizi Fransanın, 1,6 faizi Braziliyanın, 1,4 faizi Hindistanın, 1,1 faizi Belarusun, hər biri 1 faiz olmaqla Vyetnam və Polşanın, hər biri 0,9 faiz olmaqla Rumıniya, Norveç və Gürcüstanın, hər biri 0,8 faiz olmaqla İsveçrə və Niderlandın, 13,8 faizi isə digər ölkələrin payına düşüb. İdxalda maşınların, mexanizmlərin, elektrotexniki avadanlıq və aparatların, kimya sənayesi məhsullarının, nəqliyyat vasitələrinin, azqiymətli metallar və onlardan hazırlanan məmulatların, hazır ərzaq məhsulları, içkilər və tütün məmulatlarının, bitki mənşəli məhsulların, plastik kütlə və ondan hazırlanan məmulatların, toxuculuq materialları və məmulatlarının dəyəri üstünlük təşkil edib. İdxal olunan malların 67,1 faizini avtomobil, 16,7 faizini dəmir yolu, 11,1 faizini hava, 4,8 faizini dəniz nəqliyyatı ilə gətirilib, 0,3 faizini isə boru kəməri və elektrik ötürücü xətləri ilə nəql edilmiş məhsulların dəyəri təşkil edib.
Ötən ilin yanvar-avqust ayları ilə müqayisədə 2021-ci ilin yanvar-avqust aylarında mühüm məhsul növlərindən xam şəkər və şəkər idxalı 5,7 faiz, çay 6 faiz, kartof 13,5 faiz, təzə tərəvəz 41,3 faiz, minik avtomobilləri 1,7 dəfə, dərman vasitələri 0,8 faiz, hesablama maşınları, blok və qurğuları 19,7 faiz, yük avtomobilləri 1,9 dəfə, rezin şinlər 40,4 faiz, mebellər 35,8 faiz, məişət kondisionerləri 1,3 faiz, paltaryuyan maşınlar 39,1 faiz, avtobuslar 13,9 faiz, məişət soyuducuları 27,4 faiz artıb, buğda idxalı isə 30,3 faiz, bitki yağları 3,3 faiz, təzə meyvə 2,1 faiz, kərə yağı, digər süd yağları və pastaları 15 faiz, quş əti və onun əlavə məhsulları 14,1 faiz, mal əti 43,4 faiz, siqaretlər 17,5 faiz, qara metallardan borular 31,1 faiz, polad prokatı 39,7 faiz, mineral gübrələr 54,3 faiz, qara metallardan çubuqlar 70,5 faiz, polietilen 33,5 faiz, qara metallardan künclüklər 30,5 faiz, sement və sement klinkerləri 18,9 faiz azalıb.
İxracın 37,8 faizini İtaliyaya, 13,6 faizini Türkiyəyə, hər biri 4,2 faiz olmaqla Xorvatiya və Rusiyaya, 4 faizini İspaniyaya, 3,8 faizini Hindistana, hər biri 3,6 faiz olmaqla Gürcüstan və İsrailə, 2,7 faizini Tunisə, hər biri 2,4 faiz olmaqla Ukrayna və Portuqaliyaya, 2,2 faizini Birləşmiş Krallığa, 1,7 faizini Almaniyaya, 1,6 faizini İsveçrəyə, 1,1 faizini Kanadaya, hər biri 1 faiz olmaqla Tailand, Yunanıstan, Çin və Belarusa, 0,8 faizini Rumıniyaya, 0,7 faizini İndoneziyaya, 5,6 faizini isə digər ölkələrə göndərilmiş məhsulların dəyəri təşkil edib. 2021-ci ilin yanvar-avqust aylarında ixracın 84,4 faizini boru kəməri və elektrik ötürücü xətləri ilə nəql edilmiş, 8,2 faizini avtomobil, 5,3 faizini dəmir yolu, 1,4 faizini hava, 0,7 faizini dəniz nəqliyyatı ilə göndərilmiş məhsulların dəyəri təşkil edib.
İxracın strukturunda xam neft, təbii qaz, neft-qaz məhsulları, meyvə və tərəvəzlər, plastik kütlə və ondan hazırlanan məmulatlar, pambıq lifi və ipliyi, alüminium və ondan hazırlanan məmulatlar, kimya sənayesi məhsulları, qara metallar və onlardan hazırlanan məmulatlar, şəkər, bitki yağları, alkoqollu və alkoqolsuz içkilərin payı üstünlük təşkil edib. 2021-ci ilin yanvar-avqust aylarında 2020-ci ilin eyni dövrü ilə müqayisədə mühüm məhsul növlərindən təzə meyvə ixracı 36,9 faiz, kartof 12,9 faiz, şəkər 1,8 dəfə, meyvə və tərəvəz şirələri 17,2 faiz, meyvə və tərəvəz konservləri 18,3 faiz, pambıq lifi 1,6 dəfə, polietilen 1 faiz, pambıq ipliyi 2,2 dəfə, qara metallardan yarımfabrikatlar 9,1 dəfə, qara metallardan borular 7,6 faiz artıb, təzə tərəvəz ixracı isə 20,7 faiz, bitki yağları - 5,8 faiz, çay 19 faiz, tütün 34,1 faiz, təbii üzüm şərabları və üzüm suslosu 2,9 faiz, marqarin, qida üçün yararlı digər qarışıqlar 29,7 faiz, emal olunmamış alüminium 40,7 faiz, bentonit gili 6,3 faiz azalıb.
Bölmənin digər xəbərləri
