Azərbaycanlı alimin məqaləsi “Top 20” siyahısına daxil edilib

15.09.2014 [21:57]
Çap et
A⁺ A^-

Bakı, 15 sentyabr (AZƏRTAC). Klinik təcrübə və elmi tədqiqatları əhatə edən “Bioloji və tibb kitabxanalar” jurnalının məlumatına əsasən, Azərbaycan Milli Elmlər Akademiyası (AMEA) Botanika İnstitutunun bioadaptasiya laboratoriyasının müdiri, akademik İradə Hüseynovanın 2012-ci ildə “Biochimica et Biophysica Acta-Bioenergetics” jurnalında çap olunan “Huseynova I.M. Photosynthetic characteristics and enzymatic antioxidant capacity of leaves from wheat cultivars exposed to drought.Biochim Biophys Acta; 2012 Aug;1817(8):1516-23)” başlıqlı məqaləsi bu sahədə 2012-2014-cü illərdə çap olunan işlər arasından seçilən 20 top məqalədən ibarət siyahıda birinci yeri tutub.

Botanika İnstitutundan AZƏRTAC-a bildiriblər ki, bununla əlaqədar Məqalələr haqda Ödənişsiz Məlumat Xidmətinin təmsilçisi Mayk Qreubdan məktub daxil olub.

Məqalə davamlı torpaq quraqlığına məruz qalan buğda genotiplərinin ontogenez zamanı antioksidant müdafiə sistemləri və fotosintez xüsusiyyətlərinin tədqiqinə həsr edilib. Tədqiqat işində elm üçün yeni maraqlı nəticələr alınıb.

1947-ci ildən nəşr olunan “Biochimica et Biophysica Acta-Bioenergetics” jurnalı biokimya və biofizika sahəsində ilk beynəlxalq jurnaldır. Bu jurnal “Elsevier” nəşriyyatında çap olunur və 4,624 impakt faktora malikdir.

Azərbaycanlı alimin Publ.med portalına düşən məqaləsinə qısa müddətdə nüfuzlu beynəlxalq jurnallarda çoxlu istinadlar edilib və bu elmi tədqiqat dəfələrlə top siyahılara daxil olunub.

Azərbaycanlı alimin məqaləsi “Top 20” siyahısına daxil edilib

MÜƏLLİFLƏ ƏLAQƏ

Bölmənin digər xəbərləri