Azərbaycanlı deputat AŞPA-nı qaçqınların taleyinə laqeyd yanaşmamağa çağırıb
Strasburq, 26 iyun, AZƏRTAC
AŞPA-nın yay sessiyasında “Suriyaya qonşu ölkələrdə qaçqınların humanitar vəziyyəti” adlı qətnamə layihəsi dinlənilib və müzakirə edilib.
AZƏRTAC xəbər verir ki, qurumun Azad Demokratlar Qrupu adından müzakirələrə qoşulan Azərbaycanın AŞPA-dakı nümayəndə heyətinin üzvü Qənirə Paşayeva Avropanı qaçqınların taleyinə laqeyd yanaşmamağa çağırıb. Suriyada qaçqınlar böhranının bir çox aspektləri və böyük humanitar faciə olduğunu diqqətə çatdırıb.
Bildirib ki, Suriya qaçqınlarının təxminən 85 faizi qonşu ölkələrdə yerləşib və xüsusilə də Türkiyə bu humanitar böhranın ən ağır yükünü öz üzərinə götürüb. Türkiyə təxminən dörd milyon suriyalı qaçqına sığınacaq verib. Ondan sonra say baxımından suriyalı qaçqınlar Livan və İordaniyada yerləşiblər. Qənirə Paşayeva bu ölkələrdə qaçqınlarla görüşdüyünü bildirib.
Ermənistanın torpaqlarımızı işğal etməsi nəticəsində 1 milyon azərbaycanlının qaçqın və məcburi köçkün düşdüyünü diqqətə çatdıran deputat Qənirə Paşayeva Avropanı insanları öz evlərindən köçkün salan səbəblərə qarşı sərt mübarizəyə səsləyib.
“Ermənistanın torpaqlarımızı işğal etməsi səbəbindən 1 milyon insanı köçkün düşmüş bir ölkənin və millətin təmsilçisi olaraq yüz minlərlə qaçqına qısa zamanda yüksək səviyyədə dəstək göstərməyin nə qədər çətin olduğunu çox yaxşı bilirəm. Ona görə də Avropa ölkələri və biz Türkiyə başda olmaqla bu ölkələrə təşəkkür etməli və daha da çox dəstək göstərməliyik”, - deyə Qənirə Paşayeva qeyd edib.
O, Avropanın qaçqınlar siyasətini kəskin tənqid edərək deyib: “Yaxın Şərqə qonşu olan, Avropanın sərhəd qapısı Türkiyə, Livan və İordaniya birlikdə Avropaya köçmək istəyən beş milyondan çox qaçqına sığınacaq verib. Əslində bu paylaşılası bir yükdür. Lakin Avropa ölkələri paylarına düşən yükü hələ də öz üzərinə götürməyib və bu ölkələrə kifayət qədər dəstək verməyiblər. Hazırda Türkiyədə qeyri-adi bir vəziyyətdir. Çoxsaylı qaçqın problemi ilə məşğul olmaqla yanaşı, Türkiyə onlara münasib şərait yaratmaq üçün də çox çalışır. Hökumət qaçqınların sağlamlığı, təhsili və digər müvafiq xidmətlərlə yanaşı, onların qorunmasını və əsas ehtiyaclarını təmin edir. Bir çox Avropa ölkələrində qaçqınların, xüsusilə də suriyalı qaçqınların vəziyyətinin Avropa Şurasının standartları və dəyərləri baxımından gözləntilərə cavab verməməsi bizi dəhşətə gətirir. Həmin Avropa ölkələrində Suriyalı qaçqınların inteqrasiya problemlərini həll etmək və onların əsas hüquqlarına riayət etmək baxımından çox çatışmazlıq var”.
Qənirə Paşayeva bildirib ki, Suriyaya qonşu ölkələrdəki qaçqınların humanitar vəziyyəti vacib məsələdir və bu, birlikdə həll edilməlidir. Çünki Avropanın təhlükəsizliyi və mühafizəsi üçün müəyyən problemlər yaradır.
“Görüşdüyüm suriyalı qaçqınlar sizi - Avropa ölkələrini onları bu vəziyyətə salan səbəblərə qarşı daha sərt mübarizəyə və ölkələrinizin qapılarını onların üzünə bağlamamağa çağırır. Onlar sizdən daha çox dəstək gözləyir”, - deyə Qənirə Paşayeva vurğulayıb.
Şəhla Ağalarova
AZƏRTAC-ın xüsusi müxbiri
Strasburq
Bölmənin digər xəbərləri
