AZƏRBAYCANLI REJİSSORUN FİLMİ KİNOFESTİVALIN MÜKAFATINI ALMIŞDIR
AZƏRTAC xəbər verir ki, Azərbaycan kinorejissoru Alina Abdullayevanın “Nəfəs almamağa çalış” filmi İtaliyada keçirilən “Salento Finibus Terrae” beynəlxalq qısametrajlı filmlər festivalının mükafatçılarından biri olmuşdur.
“Dərviş” prodüser mərkəzi tərəfindən 2006-cı ildə çəkilmiş film “Ən yaxşı rejissor işi” nominasiyasında mükafata layiq görülmüşdür.
On beş dəqiqəlik “Nəfəs almamağa çalış” filmi gənc qızla vərəmə yoluxmuş kişinin məhəbbət tarixçəsidir. Ölümcül xəstə olan kişi ömrünün son anlarını sevgilisinə həsr edir. Baş rollarda xalq artisti Fəxrəddin Manafov və “Unformal” rok-qrupunun solisti Dilarə Kazımova çəkilmişlər.
Qeyd edək ki, Alina Abdullayeva Almaniya rejissoru Fayt Helmerin çəkdiyi “Absurdistan” filminin ikinci rejissoru olmuşdur.
Bölmənin digər xəbərləri
