“AZƏRBAYCANLILAR KONQRESİ” QƏZETİNİN İLK NÖMRƏSİ ÇAPDAN ÇIXMIŞDIR
Ümumrusiya Azərbaycan Konqresinin ictimai-siyasi və mədəni-tarixi nəşri olan “Konqress azerbaydjantsev” /”Azərbaycanlılar konqresi”/ qəzetinin ilk nömrəsi capdan çıxmışdır.
Yüksək poliqrafik şəviyyədə və rəngli çap olunmuş qəzetdə Azərbaycan Respublikasının Prezidenti Heydər Əliyevin və Rusiya Federasiyasının Prezidenti Vladimir Putinin Ümumrusiya Azərbaycan Konqresinin birinci qurultayına təbrikləri, ölkələrimizin dövlət başçılarının iştirakı ilə Sankt-Peterburqda dahi Nizaminin abidəsinin açılışı barədə xəbər və prezidentlərin fotoşəkilləri verilmişdir.
ÜAK-ın prezidenti, tibb elmləri doktoru, Rusiyanın Dövlət mükafatı laureatı Məmməd Əliyevin “Bizi millətin həmrəyliyi ideyası birləşdirmişdir” sərlövhəli geniş məqaləsində Konqresin bir illik fəaliyyətindən ətraflı bəhs edilməklə yanaşı, bu ictimai təşkilatın qarşıya qoyduğu məqsədlər bir daha açıqlanaraq vurğulanır ki, ən başlıca məram Rusiyada yaşayan soydaşlarımızın sıx birliyinə və həmrəyliyinə nail olmaqla güclü Azərbaycan diasporu yaratmaqdır.
Respublikamızın Moskvadakı səfiri Ramiz Rizayevin “Tarixi dialoq: Azərbaycan - Rusiya” sərlövhəli məqaləsində ölkələrimiz arasında diplomatik münasibətlər yaradıldıqdan sonra ötən illərdə əlaqələrin inkişafına nəzər salınır. Qəzetdə Konqresin bir illiyi və mətbu orqanın ilk mömrəsinin nəşri münasibətilə təbriklər, keçmiş SSRİ-nin neft-qaz sənayesinin görkəmli təşkilatçısı və rəhbərlərindən biri olmuş Sabit Orucovun 90 illiyinə, Azərbaycan ədəbiyyatının görkəmli təbliğçisi, şair-tərcüməçi Alla Axundovaya həsr edilmiş yazılar, böyük Sabirin 140 illiyi ilə əlaqədar Moskvada keçirilmiş yığıncaq haqqında geniş məlumat və bir sıra digər materiallar, çoxlu rəngli fotoşəkillər verilmişdir.
Nəşrin bir səhifəsi Azərbaycan dilindədir.
Bölmənin digər xəbərləri
