İQTİSADİYYAT
“AZƏRBORU” CƏHMDAR CƏMİYYƏTİNİN YENİ PERSPEKTİVLƏRİ
Sumqayıt metallurqlarının fikrincə, “Azərboru” SC səhmlərinin alınması üçün yaxın günlərdə keçiriləcək tender istehsal prosesinin mərhələlərlə bərpası proqramının gerçəkləşdirilməsinə obyektiv zəmin yaradacaq və köklü, müsbət dəyişikliklərin yaxşı təməlini qoyacaqdır.
Vaxtilə respublikanın ən iri ağır sənaye müəssisələrindən biri olmuş bu zavod uzun illərdən bəri acınacaqlı vəziyyətdədir. İstehsal, demək olar, tamamilə dayandırılmışdır. Böyük məbləğdə maliyyə borcları, o cümlədən əmək haqqı borcları var. Lakin kollektivdə belə hesab edirlər ki, əmək fəaliyyətinə məhz bu zavodda başlamış cavan kadrın müəssisənin rəhbəri təyin edilməsi perspektiv üçün ümidlər doğurmuşdur.
“Azərboru” SC idarə heyəti şurasının sədri Əzim Əzimov AZƏRTAC-ın müxbiri ilə söhbətində bildirmişdir ki, tenderdə iştirak edəcək firmaların nümayəndələri müəssisədə olmuş və öz təkliflərini təqdim etmişlər. İqtisadi İnkişaf Nazirliyində bunların kommersiya və texnoloji imkanları diqqətlə öyrənilir. Ə.Əzimovun fikrincə, müəssisədə müxtəlif profilli borular - qazma, qoruyucu, nasos-kompressor boruları, habelə neft və qaz sənayesi üçün ümumi təyinatlı borular hazırlamaq imkanının olması onu sərmayəçilərdən ötrü cəlbedici edir.
Müəssisənin mütəxəssisləri kollektivin qarşısında duran vəzifələrin mürəkkəbliyini, sərmayə qoyulmadan, müasir texnologiyalar, avadanlıq, qabaqcıl iş təcrübəsi tətbiq edilmədən bunların yerinə yetirilməsinin mümkün olmadığını aydın başa düşəcək, istehsal prosesini mərhələlərlə bərpa etmək və modernləşdirmək proqramı hazırlamışlar. Proqrama uyğun olaraq, sexlər təmir ediləcək, əsas istehsalatların, 1 və 2 nömrəli boru sexlərinin texniki kommunikasiyalarının profilləri dəyişdiriləcək, elektrik poladəritmə kompleksi yaradılacaqdır. Bununla da, dünya standartlarına uyğun məhsul buraxılması təmin ediləcəkdir.
Zavodda işlər nəzərəçarpacaq dərəcədə canlanmışdır. Praktik imkanlar sayəsində son bir neçə ayda dəmir yol kommunikasiyaları şəbəkəsi tam bərpa edilmiş və attestasiyadan keçirilmiş, elektrik enerjisindən istifadədə qayda-qanun yaradılmış, sayqaclar qoyulmuşdur, sosial sahəyə diqqət yetirilir. Maliyyə vəsaiti əldə olunmuş və 950 işçiyə bir neçə ayın maaşları verilmiş, məcburi məzuniyyətdə olan 270 fəhlənin və müxtəlif vaxtlarda istehsalat xəsarəti almış 500 fəhlənin hərəsinə 50 min manat paylanmışdır. İl ərzində 500-dək əməkçi pulsuz putyovkadan istifadə edərək, zavodun “Metallurq” sanatoriyasında dincəlmişdir.