“Azərikimya”nın işçiləri ilk yaz iməciliyi keçirmişlər
Sumqayıt, 16 aprel (AZƏRTAC). Azərbaycan Respublikası Dövlət Neft Şirkətinin “Azərikimya” İstehsalat Birliyinin (İB) müəssisələrində ulu öndər Heydər Əliyevin anadan olmasının 90 illik yubileyinə həsr olunmuş iməcilik keçirilmişdir.
İlk yaz iməciliyində İstehsalat Birliyi aparatının, etilen-polietilen, üzvi sintez, mexaniki-təmir zavodlarının, təmir-tikinti, nəqliyyat və xüsusi texnika idarələrinin, “Kimyalayihə” İnstitutunun və anbar təsərrüfatının 500-dən artıq işçisi iştirak etmişdir.
“Azərikimya” İB-dən AZƏRTAC -a bildirmişlər ki, İstehsalat Birliyinin kimya müəssisələrinin və idarələrinin daxili ərazilərində, həmçinin sənaye zonasının S.Vurğun küçəsi boyunca 800-ə yaxın müxtəlif növ ting və bəzək ağacları əkilmiş, mövcud yaşıllıq sahələrinə aqrotexniki qulluq göstərilmiş, ərazilərdə təmizlik-abadlıq işləri aparılmışdır.
Sumqayıtın ekoloji təmiz şəhərə çevrilməsində fəal iştirak edən kimyaçıların səyi ilə son üç ildə şəhərin sənaye zonasında yaşıllıq sahələri xeyli genişləndirilmiş, 80 mindən artıq ağac əkilmişdir.
Kimyaçıların ekoloji missiyası uğurla davam etdirilməkdədir.
Bölmənin digər xəbərləri
