AZTƏMİNATLI TƏBƏQƏNİN SOSİAL MÜDAFİƏSI SAHƏSİNDƏ YENİ QANUNVERİCİLİK BAZASI HAZIRLANIR
Dövlət Sosial Müdafiə Fondunun sədri Səlim Müslümov AZƏRTAC-ın müxbirinə demişdir ki, bu ildən başlayaraq ölkəmizdə əmək pensiyası təminatının yeni sisteminə keçiləcəkdir. Ümummilli liderimiz Heydər Əliyevin Sərəncamı ilə “Azərbaycan Respublikasında Pensiya İslahatı Konsepsiyası” hələ 2001-ci ilin iyulunda təsdiq olunmuşdu. Sərəncama əsasən, ölkədə pensiya islahatları 4 il ərzində başa çatdırılmalı və yeni pensiya sistemi 2006-cı il yanvarın 1-dən fəaliyyətə başlamalı idi. Müvafiq qurumlar konsepsiyanın reallaşdırılması üçün nəzərdə tutulan tədbirləri, əslində, başa çatdırmışlar. Məqsəd bazar iqtisadiyyatına uyğun yeni sosial müdafiə sistemi formalaşdırmaqdır. “Ünvanlı sosial yardım haqqında” Qanun Milli Məclis tərəfindən qəbul edilərək, yanvarın 1-dən qüvvəyə minmiş, “Əmək pensiyaları haqqında” və “Dövlət sosial müavinətləri haqqında” qanunlar isə parlamentdə birinci oxunuşdan keçmişdir. Bu qanunlar ölkədə aztəminatlı təbəqənin cosial müdafiəsi sahəsində yeni qanunvericilik bazası sistemini təşkil edəcəkdir.
Bölmənin digər xəbərləri
