BAKI BANKLARARASI VALYUTA BİRJASI 15 İLLİK YUBİLEYİNİ QEYD EDİR
Bakı Banklararası Valyuta Birjası (BBVB) Qapalı Səhmdar Cəmiyyətinin yaradılmasından 15 il keçir.
Azərbaycanda valyuta birjasının yaradılması təşəbbüsünü 1993-cü il iyulun 26-da ölkənin Milli Bankı və bir neçə dövlət kredit müəssisəsi - Beynəlxalq Bank, Əmanət Bankı, Sənaye-İnvestisiya Bankı və Aqrar-Sənaye Bankı irəli sürmüşlər.
Fəaliyyətinin lap əvvəlindən ölkənin maliyyə sisteminin mühüm elementinə çevrilmiş BBVB-nin əsas məqsədi mütəşəkkil valyuta bazarı yaratmaqdan ibarət olmuşdur. BBVB-nin təqdim etdiyi maliyyə xidmətlərinin spektri genişləndikcə onun fəaliyyətində universallıq prinsipi üstünlük təşkil edir.
Birjanın informasiya-təhlil şöbəsindən AZƏRTAC-a bildirmişlər ki, Maliyyə Nazirliyinin emissiya etdiyi dövlət qısamüddətli istiqrazlarının (DQİ) dövriyyəsinə xidmət, səhm bazarı sektorunda ilk əqdlərin təşkili, Qiymətli Kağızlar Depozitarisinin yaradılması, fond bazarında mühasibat uçotu əməliyyatlarına dair standartların təsdiq edilməsi, listinq üzrə xüsusi komissiyanın təsis edilməsi, ilk banklararası kredit hərracları, eləcə də Universal Ticarət-Hesablaşma Birja Kompleksinin işə salınması kimi layihələr ölkəmizdə ilk dəfə məhz BBVB və onun səhmdarları tərəfindən həyata keçirilmişdir. Yeri gəlmişkən, bu kompleks 2001-ci ildə birjanın istifadəyə verdiyi, Cənubi Qafqazda ilk birja ticarəti sistemi olmuş “BEST” informasiya-ticarət sisteminin proobrazı idi.
BBVB öz yubileyini əlamətdar nəticələrlə qarşılayır. Bu il iyulun 25-dək BBVB-nin birja bazarlarında keçirilmiş bütün hərracların ümumi məbləği 1,74 milyard ABŞ dollarından çox olmuşdur. Bu, keçənilki bütün dövriyyənin 93 faizinə bərabərdir. 15 ildə birjada 4.500-dən çox alqı-satqı sessiyası keçirilmiş, BBVB-nin məcmu ticarət dövriyyəsi isə dollar ekvivalentində 15 milyarddan çox olmuşdur. Bu rəqəmlər bir daha sübut edir ki, BBVB-nin elektron hərrac sistemi həm yeni iştirakçılar cəlb edilməsi, həm də dövriyyədə olan maliyyə vasitələrinin və aparılan əməliyyatların həcminin artırılması baxımından kifayət qədər güclü inkişaf potensialına malikdir.
