Bakı İdman Sarayında “Arpaçay Open” beynəlxalq karate turniri start götürüb
Bakı, 18 yanvar, AZƏRTAC
Yanvarın 18-də Bakı İdman Sarayında 20 Yanvar şəhidlərinin xatirəsinə həsr olunan “Arpaçay Open” beynəlxalq karate turniri start götürüb.
AZƏRTAC xəbər verir ki, Azərbaycan Milli Karate Federasiyasının və “Arpaçay” karate klubunun təşkilatçılığı ilə keçirilən açıq turnirdə uşaqlar, yeniyetmələr və gənclər iştirak edirlər.
Turnirin birinci günündə bütün yaş qruplarında fərdi kata yarışları keçirilir. Yanvarın 19-da 6-11 yaşlı uşaqlar arasında fərdi və komanda kumite çıxışları, ertəsi gün isə 12-13 yaşlı uşaqlar, 14-15 yaşlı yeniyetmələr və 16-17 yaşlı gənclərin iştirakı ilə müxtəlif çəki dərəcələrində kumite görüşləri təşkil olunacaq.
Ölkəmizdə üçüncü dəfədir keçirilən yarışlara 11 ölkədən 800-dək idmançı qatılıb.
Qalib və mükafatçılar diplom, kubok və medallarla təltif olunacaq.
Bölmənin digər xəbərləri
