BAKI SOS UŞAQ KƏNDİNDƏ “QLOBAL SÜLH OYUNLARI”TURNİRİ KEÇİRİLİR
AZƏRTAC-ın müxbiri xəbər verir ki, BMT-nin 2001-2010-cu illəri Sülh və zorakılıqsız həyat mədəniyyəti onilliyi elan etməsi ilə əlaqədar bu müddətdə “Qlobal sülh oyunları”nın keçirilməsi nəzərdə tutulmuşdur. Oyunların məqsədi uşaqlara və yeniyetmələrə dünya dostluğu, sülh mədəniyyəti missiyasında öz aparıcı yerlərini tutmaq, BMT-nin məqsədləri haqda biliklər əldə etmək, bu məqsədlərə nail olmaq üçün imkan yaratmaqdır. “SOS Uşaq Kəndləri” Təşkilatı məhz sülhməramlı məqsədləri nəzərə alaraq artıq 4 ildir ki, öz Kəndlərində bu oyunları təşkil edir. “Sülh oyunları”nın iştirakçıları Nobel Sülh Mükafatı laureatları tərəfindən tərtib edilmiş manifestə qoşulurlar.
Bakı SOS Uşaq Kəndinin təşkil etdiyi turnirdə Kəndin yaxınlığında yerləşən orta məktəblərin 10 komandası iştirak edəcək. Qaliblərə kuboklar və hədiyyələr təqdim olunacaq. Turnirin açılış mərasimində hökumət nümayəndələri, idman qurumları, qeyri-hökumət təşkilatları, Azərbaycan Futbol Federasiyaları Assosiasiyasının və ictimaiyyət nümayəndələrinin iştirakı nəzərdə tutulur.
