MƏDƏNİYYƏT
BAKIDA AVSTRİYA MƏDƏNİYYƏTİ GÜNLƏRİ BAŞLANIR
Sentyabrın 5-də Bakıda Avstriya Mədəniyyəti günləri başlanır. Respublika Mədəniyyət Nazirliyindən AZƏRTAC-a bildirmişlər ki, rəsmi açılış bədii sərgi salonunda olacaqdır. Elə buradaca Avstriyaya həsr olunmuş fotosərgi nümayiş etdiriləcəkdir. Avstriya nümayəndə heyətinə Vyana meriyası mədəniyyət idarəsinin rəisi Berhard Benşer başçılıq edəcəkdir.
Ölkəmizə Avstriyanın tanınmış mədəniyyət və incəsənət xadimləri - aktyorlar, rəssamlar, kinematoqrafçılar, habelə aşbaz-kulinarlar gəlmişlər. Bundan əlavə, M.F.Axundov adına Dövlət Kitabxanasında “Avstriya salonu”nun açılışı nəzərdə tutulmuşdur. Həmin mərasimdə Vyana şəhərinin meriyası kitabxanaya Avstriya Respublikasının tarix və mədəniyyətinə aid 1100 kitab bağışlayacaqdır.
Xatırladaq ki, bu ilin aprelində Avstriyada Azərbaycan Mədəniyyəti günləri keçirilmişdir. Tədbirdə mədəniyyət naziri Polad Bülbüloğlu başda olmaqla respublikamızın nümayəndə heyəti iştirak etmişdir.