Bakıda bərabərlik naminə yoldaşlıq oyunu təşkil olunub
Bakı, 4 mart, AZƏRTAC
Martın 4-də Birləşmiş Millətlər Təşkilatının (BMT) rəsmiləri, Azərbaycanda akkreditə olunmuş bir sıra diplomatik missiyaların nümayəndələri və qızlardan ibarət milli komandanın (U-17 və U-19) üzvlərinin iştirakı ilə ölkədə gender bərabərliyini dəstəkləmək və 8 Mart - Beynəlxalq Qadınlar Gününü qeyd etmək üçün yoldaşlıq oyunu keçirilib.
AZƏRTAC AFFA-ya istinadla xəbər verir ki, qadınlar və kişilərdən ibarət dörd komanda BMT-nin Azərbaycan nümayəndəliyinin hazırladığı və üzərində #bərabərliknaminə həştəqi, eləcə də Dayanıqlı İnkişaf Məqsədlərinin əks olunduğu futbol köynəkləri və topla çıxış ediblər.
Tədbir BMT, AFFA və Missiya Rəhbərləri Xanımlarının Təşkilatı (HOMS) tərəfindən təşkil olunub.
“Gendər bərabərliyi və qızların səlahiyyətləndirilməsini təşviq etmək üçün Azərbaycanın ulduz futbolçuları ilə birlikdə oynamaq çox maraqlı idi”, - deyə BMT-nin rezident əlaqələndiricisi Qulam İshaqzai bildirib. O, AFFA-ya, diplomatik missiya nümayəndələrinə, HОMS-a və BMT əməkdaşlarına iştirak və dəstəklərinə görə təşəkkür edib.
AFFA-nın kütləvi futbol departamentinin rəhbəri Cahangir Həsənzadə BMT-nin Azərbaycandakı nümayəndəliyinə qız futbolu və gender bərabərliyinə verdiyi davamlı dəstəyə görə minnətdarlığını bildirib. О, bu sahədə görülən işlərə görə BMT-nin Azərbaycandakı rezident əlaqələndiricisinə mükafat və təşəkkürnamə təqdim edib.
Bölmənin digər xəbərləri
