BAKIDA CÜDO ÜZRƏ DÜNYA KUBOKU UĞRUNDA TURNİR BAŞLAMIŞDIR
Bakı, 10 oktyabr (AZƏRTAC). Oktyabrın 10-da Bakı İdman Sarayında kişi cüdoçular arasında Dünya kuboku uğrunda turnir başlamışdır.
Yarışda Azərbaycan, Polşa, Rusiya, Fransa, Gürcüstan, İsrail, Portuqaliya, Türkiyə, Yunanıstan, Yaponiya, Norveç, Özbəkistan, Ukrayna və Belarusdan 7 çəki dərəcəsi üzrə 100-dək idmançı mübarizə aparacaqdır.
Turnirin ilk günü tatami üzərinə 60, 66 və 73 kiloqram çəki dərəcələrində yarışan idmançılar çıxmışlar.
Artıq ilkin görüşlərin nəticələri məlumdur. 66 kiloqram çəki dərəcəsində Azərbaycan idmançısı Vüqar Şirinli birinci görüşündə üçqat Olimpiya çempionu yaponiyalı Nomura Tadahiro üzərində qələbə qazanmışdır. V.Şirinlinin növbəti rəqibi Gürcüstan idmançısı Amiran Papinaşvili olacaqdır.
Ümumiyyətlə, Dünya kuboku turnirinin startı Azərbaycan idmançıları üçün uğurlu olmuşdur. Bu gün tatami üzərinə çıxan Sərxan Əhmədov (66 kq), Zamiq Əhmədli (73 kq) ilk görüşlərini qələbə ilə başa vurmuşlar.
Dünya kuboku iki gün davam edəcəkdir.
Bölmənin digər xəbərləri
