BAKIDA ƏMƏK YARMARKASI AÇILMIŞDIR
Oktyabrın 10-da Bakıda, İdman Oyunları Sarayında Əmək və Əhalinin Sosial Müdafiəsi Nazirliyi tərəfindən təşkil edilən əmək yarmarkası açılmışdır. Bu, bazar iqtisadiyyatı şəraitində ölkəmizin vətəndaşlarının sosial hüquqlarının təmin və müdafiə olunması sahəsində nazirliyin həyata keçirdiyi proqramın bir hissəsidir. Əmək və əhalinin sosial müdafiəsi naziri Əli Nağıyev yarmarkanın açılışında iştirak etmişdir.
İndiki əmək yarmarkası sayca beşincidir. İlk yarmarka 1997-ci ildə təşkil olunmuşdur və sonrakı illərdə nazirliyin müvafiq strukturlarının fəal işi sayəsində Azərbaycanın 27 min vətəndaşı işlə təmin edilmişdir.
Cari ildə ölkəmizin 53 şəhər və rayonunda da əmək yarmarkaları keçirilmişdir. Həmin yarmarkalarda 3 minədək adam işlə təmin edilmiş, 321 nəfər ixtisasartırma kursları keçmiş, 432 adam tam əmək haqqı ödənilməklə ictimai işlərə cəlb olunmuşdur.
İndiki yarmarkada 600-dək müəssisə, firma, şirkət və təşkilat iştirak edir. Onların 356-sı özəldir. Yarmarka iştirakçıları təxminən 3 min boş iş yeri təklif etmişlər ki, bunun da 120-si əlillər üçün nəzərdə tutulmuşdur.
Burada 41 xarici şirkət, o cümlədən bp, “Koka-kola”, “Azərsunholdinq”, “Kaspian Şipyard kompani”, “Qrand hotel Avropa”, “Yevropian Tobako Bakı”, “Hayat hotel kompani” və başqa şirkətlər də iştirak edirlər. Onlar yarmarkaya təxminən 300 boş iş yeri çıxarmışlar.
Bölmənin digər xəbərləri
