Bakıda Gənclər Təşkilatlarının Resurs Mərkəzi açılıb
Bakı, 6 mart, AZƏRTAC
Azərbaycan Respublikası Gənclər Fondunun dəstəyi və Azərbaycan Respublikası Gənclər Təşkilatları Milli Şurasının (ARGTMŞ) təşkilatçılığı ilə Bakıda Gənclər Təşkilatlarının Resurs Mərkəzi açılıb.
ARGTMŞ-dan AZƏRTAC-a bildiriblər ki, açılış mərasimi Azərbaycan Respublikası Gənclər və İdman nazirinin müavini Fərhad Hacıyevin çıxışı ilə başlayıb. O, çıxışında yeni yaradılmış Resurs Mərkəzinin gənclərin və gənclər təşkilatlarının ictimai-sosial həyata qoşulmasındakı əhəmiyyətindən və dövlət gənclər siyasətindən danışıb. Qeyd edib ki, ARGTMŞ-ya üzv olan gənclər təşkilatları üçün belə bir şəraitin yaradılması dövlətimizin gənclərə olan münasibətinin bariz nümunəsidir.
Gənclər Fondunun icraçı direktoru Fərid Cəfərov bu platformanın təşkilatların bir növ qarşılaşdıqları ofis probleminin müəyyən mənada həll olunması, eyni zamanda, təşkilatların ortaq bir məkanda həm ideya mübadiləsi etməsi, həm də yeni ideyaların yaranması üçün birgə çalışması baxımından məkan olacağını bildirib.
Azərbaycan Respublikası Gənclər Təşkilatları Milli Şurasının (ARGTMŞ) sədri Məryəm Məcidova yeni açılmış Resurs Mərkəzinin təqdimatını edib. Bildirib ki, Resurs Mərkəzində ARGTMŞ-ya üzv olan gənclər təşkilatlarının ofis və texniki avadanlıqlarla təmin edilməsi ilə yanaşı, gənclər təşkilatları üçün istər yerli, istərsə də beynəlxalq layihələrə düzgün müraciət edilməsində dəstək olunması və mühasib xidmətinin göstərilməsi nəzərdə tutulub.
Resurs Mərkəzinin açılış mərasimindən sonra Azərbaycan Respublikası Gənclər Təşkilatları Milli Şurası məclisinin növbəti iclası keçirilib.
İclasın gündəliyi təsdiqləndikdən sonra məclisin sədri “İnternat Məzunlarının Sosial İnteqrasiyası Gənclər” İctimai Birliyinin sədri Araz Əhmədov tədbiri açıq elan edib.
Sonra Layihələr üzrə katib Azər Əliyev son 6 ayda ARGTMŞ-nin fəaliyyəti ilə bağlı hesabatı təqdim edərək keçirilən tədbirlər, konfranslar və kampaniyalar barədə geniş məlumat verib.
Proqrama uyğun olaraq ARGTMŞ-nın Mərkəzi Nəzarət Təftiş Komissiyasının sədri Sona Əlizadə Şuranın 2019-cu ilin ikinci yarımilliyi üzrə Mərkəzi Nəzarət Təftiş Komissiyasının hesabatını təqdim edib.
Tədbirin gedişatında üzvlük üçün müraciət edən “Gənclərin İntellektual İnkişafına Yardım”, “Böyük Yol Gənclər”, “Erasmus Tələbə Şəbəkəsi-Azərbaycan” və “Uşaq və Yeniyetmələrə Dəstək” İctimai birlikləri ARGTMŞ-ya assosiativ üzvlüyə qəbul üçün təqdimatlar edib, səsvermə prosesindən sonra səs çoxluğu ilə qəbul olunublar.
Sonda ARGTMŞ-nın Baş katib vəzifəsinə təşkilatın Layihələr üzrə katibi Azər Əliyevin namizədliyi irəli sürülüb. O, əvvəlcə gənclər təşkilatlarındakı fəaliyyətindən, həyata keçirdiyi layihələrdən və gələcək planlarından söz açıb. Azər Əliyev səs çoxluğu ilə Baş katib seçilib.
İclas cari məsələlərin müzakirəsi ilə yekunlaşıb.
Bölmənin digər xəbərləri
