Bakıda ilk dəfə görkəmli Azərbaycan geoloquna həsr olunmuş geniş ekspozisiya nümayiş etdirilib
Bakı, 12 may, AZƏRTAC
Milli Azərbaycan Tarixi Muzeyində tanınmış azərbaycanlı geoloq, neftçi və alim Baba Babazadənin anadan olmasının 115 illiyinə həsr edilmiş anım tədbiri keçirilib.
AZƏRTAC xəbər verir ki, tədbirin təşkilatçısı alimin nəvəsi Nigar Babazadə olub. Azərbaycan Neftçi Geoloqları Cəmiyyəti və Milli Azərbaycan Tarixi Muzeyi tədbirə dəstək göstərib.
Tədbirdə çıxış edən Elm və Təhsil Nazirliyinin Geologiya İnstitutunun baş elmi işçisi geologiya-mineralogiya üzrə fəlsəfə doktoru Şahvələd Köçərli Baba Babazadənin ölkəmizdə geologiya elminin inkişafındakı rolundan danışıb. O, alimlə birgə çalışdığı illərlə bağlı xatirələrini bölüşərək vurğulayıb ki, Baba Babazadə böyük elmi məktəb yaradıb və neft laylarının təsnifatının əsasını qoyub.
SOCAR-ın şöbə rəisi, NGC İstehsalat Birliyinin sədr müavini, Yer elmləri üzrə fəlsəfə doktoru Elvin Əhmədov isə Baba Babazadənin Azərbaycanın həm dəniz, həm də quru neft yataqlarının inkişafında mühüm rol oynadığını bildirib. Onun sözlərinə görə, alimin elmi araşdırmaları bu gün də aktuallığını qoruyur, hazırladığı metodika isə gənc geoloqlar üçün fundamental baza hesab olunur.
Əqli Mülkiyyət Agentliyinin Respublika Elmi-Texniki Kitabxanasının direktor müavini Sevda Rəsulova Baba Babazadənin kitablarının istifadə məqsədilə kitabxanaya təqdim edildiyini diqqətə çatdırıb.
Tədbirin əsas xüsusiyyəti ondan ibarət olub ki, Milli Azərbaycan Tarixi Muzeyində Baba Babazadəyə həsr olunmuş geniş ekspozisiya ilk dəfə nümayiş etdirilib. Ekspozisiyada alimin ailəsi tərəfindən muzeyə təqdim olunan şəxsi əşyalar, kitablar, portretlər, fotolar, məqalələr, mükafatlar, sənədlər və ailə arxivindən qəzet materialları sərgilənib.
Tədbir çərçivəsində, həmçinin 2023-cü ildə Baba Babazadənin doğulduğu Ramana qəsəbəsindəki evin üzərində xatirə lövhəsinin açılması, eləcə də son üç ildə nəşr olunmuş və alim haqqında məqalələrin yer aldığı kitablar barədə məlumat verilib. Bunlar arasında “Ramana sakinləri”, “İkinci Dünya müharibəsi illərində Ramana sakinləri”, “Buzovna ensiklopediyası. Vətənnamə” və “1941–1945-ci illərin Sosialist Əməyi Qəhrəmanları” kitabları yer alıb.
Sonda AzTV tərəfindən çəkilmiş və görkəmli geoloqa həsr olunmuş “Məzmunlu ömür” sənədli filmi nümayiş etdirilib.
Bölmənin digər xəbərləri
