BAKIDA İNTERPOLUN “KALKAN” LAYİHƏSİ ÜZRƏ İŞÇİ QRUPUNUN 2-Cİ GÖRÜŞÜ İŞƏ BAŞLAMIŞDIR
Azərbaycanın dövlət himni və İnterpolun marşı səslənmişdir.
25 dövlətin terrorçuluqla mübarizə orqanlarının və İnterpolun Milli Mərkəzi Büroları nümayəndələrinin iştirak etdiyi tədbiri açan Azərbaycan daxili işlər nazirinin müavini, polis general-mayoru Vilayət Eyvazov demişdir ki, transmilli cinayətkarlığa və beynəlxalq terrorizmə qarşı birgə səmərəli mübarizə aparmaq üçün müxtəlif formalarda əməkdaşlıq daha da möhkəmləndirilməlidir. Bu mənada o, beynəlxalq qurum kimi, İnterpolun üzərinə düşən vəzifələrdən və 1992-ci ildə İnterpola üzv qəbul olunduqdan sonra təşkilat çərçivəsində Azərbaycanda görülən işlərdən danışmışdır.
Nazir müavini İnterpolun Baş Katibliyinin nümayəndələrinin Bakıda keçirilən tədbirdə iştirakını yüksək qiymətləndirərək, bütün dünyada böyük problem yaradan terrorizm mövzusunun “Kalkan” layihəsi əsasında geniş müzakirəsinin əhəmiyyətini vurğulamışdır.
Azərbaycanın terrorizmə qarşı mübarizədə bütün beynəlxalq konvensiya və protokollara qoşulduğunu, antiterror koalisiyasında fəal iştirakını diqqətə çarpdıran Vilayət Eyvazov, bununla əlaqədar ölkəmizdə hüquq mühafizə və xüsusi xidmət orqanları ilə əməkdaşlığın yüksək səviyyədə olduğunu, terrorizmə qarşı mübarizə ilə bağlı xarici ölkələrlə operativ informasiya mübadiləsi aparıldığını, Azərbaycanda maliyyə vəsaiti toplayıb, onu terrorçulara verməkdə şübhəli bilinən altı təşkilatın filiallarının aşkarlanaraq, fəaliyyətlərinin dayandırıldığını bildirmişdir. Bu filiallarla əlaqəsi olan 43 şəxs ölkədən çıxarılmışdır.
Tədbirdə İnterpolun Baş Katibliyinin polis xidmətləri üzrə icraçı direktoru Jan-Mişel Lubutan, milli təhlükəsizlik nazirinin müavini Əli Nağıyev, İnterpolun Azərbaycandakı Milli Mərkəzi Bürosunun rəisi, polis general-mayoru Mədət Quliyev və başqaları çıxış edərək, Mərkəzi Asiyada və qonşu ölkələrdə terrorçuluqla mübarizə problemlərini, terror təşkilatlarında üzvlük, terrorçuluğun maliyyələşdirilməsi, terror təşkilatlarının üzvləri tərəfindən istifadə olunan oğurlanmış saxta sənədlər, habelə terrorçuların təlim düşərgələrinin təşkilatçıları və digər məsələləri əhatə edən “Kalkan” layihəsi haqqında ətraflı danışmışlar.
Bildirilmişdir ki, müvafiq regionda terrorçuluğun və onun yeni təzahürlərinin müzakirəsi, terrorçuluqla mübarizə sahəsində əməkdaşlığın, təcrübə mübadiləsinin gücləndirilməsi, təkmilləşdirilməsi, regionda və beynəlxalq səviyyədə fəaliyyət göstərən, müxtəlif ölkələrdə əlaqələrə malik olan terror şəbəkələrinin eyniləşdirilməsi, habelə üzv dövlətlərə bəzi praktiki tövsiyələrin verilməsi məqsədi ilə “Kalkan” layihəsi üzrə işçi qrupunun 1-ci görüşü ötən ilin aprelində Qazaxıstanın Almatı şəhərində keçirilmişdir.
Fevralın 2-də işini yekunlaşdıracaq tədbirdə terrorçuluqla mübarizə sahəsində geniş və hərtərəfli məlumat mübadiləsi aparılacaq, görülmüş işlər və qarşıda duran vəzifələr müzakirə olunacaqdır.
Bölmənin digər xəbərləri
