BAKIDA KƏND TƏSƏRRÜFATI MƏHSULLARININ NÖVBƏTİ SATIŞ YARMARKALARI KEÇİRİLMİŞDİR
AZƏRTAC xəbər verir ki, iyulun 13-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz və bostan məhsulları çıxarılmışdı.
“Təzə bazar” MMC-nin həyətindəki yarmarkaya Sabirabad, Zərdab, Gədəbəy, Hacıqabul və digər rayonlardan müxtəlif çeşidli kənd təsərrüfatı məhsulları gətirilmişdi.
Kənd Təsərrüfatı Nazirliyinin nümayəndəsi Fərhad Qəmbərovun verdiyi məlumata görə, bazar günü burada əhaliyə 15,62 ton məhsul, o cümlədən 1 ton ət, 0,1 ton ağartı, 4 ton tərəvəz, 3 ton kartof, 2,5 ton bostan məhsulları, 4 ton meyvə, 6 min ədəd yumurta, 20 kiloqram bal təklif olunmuşdur.
Yarmarkada qoyun ətinin kiloqramı 4 manat 50 qəpiyə, mal əti 4 manat 20 qəpiyə, quş əti 3 manat 80-4 manat 20 qəpiyə, bal 9-10 manata, alma 30-60, armud 40-80, çuğundur, yerkökü, kələm 60, pomidor, lobya 40-50, kartof, soğan 30-40, yumurtanın bir ədədi 10, göyərtinin dəstəsi 10-15 qəpiyə satılmışdır.
Metronun “Əhmədli” stansiyasının yaxınlığında, “Azər” ticarət mərkəzində təşkil olunmuş yarmarkaya çıxarılan meyvə-tərəvəz və heyvandarlıq məhsulları, o cümlədən badımcan, xiyar, soğan, kartof, lobya, pomidor, kələm, qarpız ucuz qiymətlərə satılırdı.
Kənd Təsərrüfatı Nazirliyinin nümayəndəsi Namiq Qüdrətovun verdiyi məlumata görə, şənbə və bazar günləri Şəmkir, Quba, Salyan, Kürdəmir və digər rayonların fermerləri yarmarkada 294 tonadək məhsul satmışlar.
Suraxanıda “Günəş” ticarət mərkəzindəki yarmarkada Balakən, Qobustan, Samux, Daşkəsən, Quba və Biləsuvar rayonlarının fermerləri satışa 55 tona yaxın məhsul çıxarmışlar.
Kənd Təsərrüfatı Nazirliyinin nümayəndəsi Mustafa Rüstəmov demişdir ki, yarmarkada satılan məhsulların qiyməti bazardakından 20-35 faizə qədər ucuz olmuşdur. Satışda meyvə tərəvəz, bitkiçilik məhsulları, ət-süd məmulatları, konservləşdirilmiş məhsullar üstünlük təşkil etmişdir.
“Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkada isə Cəlilabad rayonunun fermerleri bazar günü 5 tondan çox məhsul satmışlar. Burada da qiymətlər bazardakından 25-30 faiz ucuz olmuşdur.
Biləcəri qəsəbəsi, Məlik Aslanov küçəsi, 284 nömrəli orta məktəbin qarşısındakı yarmarkada Kənd Təsərrüfatı Nazirliyinin nümayəndəsi Qalib Hacızadə bildirmişdir ki, bazar günü Ağsu rayonundan 13,6, Qazax rayonundan isə 14,3 ton meyvə-tərəvəz və süd məhsulları gətirilmişdir. Burada şəhər sakinlərinə pomidorun kiloqramı 20, qarpız 10, kartof 20-30, şaftalı 45-50 qəpiyə təklif olunur. Alıcılar məhsulların qiymətlərinin onlar üçün sərfəli olduğunu bildirirdilər.
Binəqədi rayonunda 6 nömrəli Bakı Texniki Peşə Liseyinin qarşısındakı yarmarkaya müxtəlif çeşiddə kənd təsərrüfatı məhsulları çıxarılmışdı. Qiymətləri bazardakından 45-50 faiz ucuz olan meyvə-tərəvəz və heyvandarlıq məhsulları həm də keyfiyyəti ilə fərqlənirdi. Şəhər sakinləri təzə pomidoru, kələmi, lobyanı, badımcanı həvəslə alırdılar.
İşçi qrupunun rəhbəri Qadir Həsənovun verdiyi məlumata görə, Bərdə, Goranboy və Ağstafa fermerləri şənbə və bazar günlərində yarmarkada 16 tonadək məhsul satmışlar.
######
Bölmənin digər xəbərləri
