BAKIDA KƏND TƏSƏRRÜFATI MƏHSULLARININ NÖVBƏTİ SATIŞ YARMARKALARI KEÇİRİLMİŞDİR
AZƏRTAC xəbər verir ki, iyulun 20-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz və bostan məhsulları çıxarılmışdı.
Kənd Təsərrüfatı Nazirliyinin nümayəndəsi Fərhad Qəmbərovun verdiyi məlumata görə, “Təzə bazar” MMC-nin həyətindəki yarmarkaya Sabirabad, Zərdab, Gədəbəy, Hacıqabul və digər rayonlardan 18,83 ton məhsul, o cümlədən 1,8 ton ət, 0,3 ton ağartı, 5,2 ton tərəvəz, 4 ton kartof, 3 ton bostan məhsulları, 4,5 ton meyvə, 13 min ədəd yumurta, 30 kiloqram bal gətirilmişdir. Burada qiymətlər bazardakından 20-25 faiz aşağıdır. Belə ki, qoyun ətinin kiloqramı 4 manat 50 qəpiyə, mal əti 4 manat 20 qəpiyə, quş əti 3 manat 80-4 manat 20 qəpiyə, bal 9-10 manata, alma 40-60, armud 40-80, çuğundur, yerkökü, kələm 60, gavalı, pomidor, lobya, badımcan, kartof, soğan 30-40, yumurtanın bir ədədi 10, göyərtinin dəstəsi 10-15 qəpiyə satılır.
Metronun “Əhmədli” stansiyasının yaxınlığında “Azər” ticarət mərkəzində təşkil olunmuş yarmarkada Quba, Şəmkir, Salyan, Ağcabədi, Qəbələ, Kürdəmir, Biləsuvar və digər rayonların fermerləri satışa 52 ton kartof, 145 ton tərəvəz, 56 ton meyvə və digər kənd təsərrüfatı məhsulları çıxarmışdılar.
Yarmarkaya gəlmiş kənd təsərrüfatı naziri İsmət Abasov burada satıcılar və alıcılar üçün yaradılmış şəraitlə tanış olmuşdur. Nazir ölkə Prezidenti İlham Əliyevin kənd təsərrüfatının inkişafı ilə bağlı imzaladığı fərman və sərəncamların əhəmiyyətindən danışmış, suallara cavab vermişdir.
İ.Abasov 2008-ci ildə ötən ilin müvafiq dövrü ilə müqayisədə daha çox kənd təsərrüfatı məhsulları istehsal olunduğunu bildirmişdir. Bakıda yarmarkaların təşkil olunmasına iki il bundan əvvəl başlandığını xatırladan nazir indiyədək paytaxtda 210 yarmarka keçirildiyini, bu yarmarkalarda 42 min 200 tondan çox məhsul satıldığını diqqətə çatdırmışdır. O, yarmarkalarda satılan meyvə-tərəvəzin və heyvandarlıq məhsullarının qiymətlərinin bazardakından 25-30, bəzən də 40 faiz ucuz olduğunu qeyd edərək, yarmarkaların davam etdiriləcəyini söyləmişdir.
Burada bazarlıq edən şəhər sakinləri yarmarkanın təşkilindən razı qaldıqlarını bildirmişlər.
Suraxanıda “Günəş” ticarət mərkəzindəki yarmarkada Balakən, Qobustan, Samux, Daşkəsən, Quba, Biləsuvar və Lənkəran rayonlarının fermerləri əhaliyə 53 tondan çox məhsul təklif edirdilər.
Kənd Təsərrüfatı Nazirliyinin nümayəndəsi Mustafa Rüstəmov demişdir ki, yarmarkada satılan məhsulların qiyməti bazardakından 30-35 faizə qədər ucuzdur. Satışda meyvə-tərəvəz, bitkiçilik və konserv məhsulları, ət-süd məmulatları vardır. Alıcılar məhsulun qiymətindən və keyfiyyətindən razıdırlar.
“Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkada isə Cəlilabad rayonunun fermerleri satışa 7 tondan çox məhsul çıxarmışdılar.
A.Şərifzadə küçəsi, 194, metronun “İnşaatçılar” stansiyasının yaxınlığındakı yarmarkaya Quba, Qusar, Salyan və digər rayonlardan 52 tondan çox müxtəlif çeşidli kənd təsərrüfatı məhsulları gətirilmişdi.
Gədəbəyli Firuz Həsənov bildirmişdir ki, hər dəfə yarmarkaya şəxsi yük maşınında 2-3 ton kartof gətirir. Fermerin sözlərinə görə, burada indiyədək 70 tondan çox məhsul satmışdır.
Kənd Təsərrüfatı Nazirliyinin və Yasamal Rayon İcra Hakimiyyətinin nümayəndələri fermerlərə satış üçün münasib şərait yaradır, qiymətlərə ciddi nəzarət edirdilər. Alıcılar yarmarkanın təşkilatçılarına minnətdarlıqlarını bildirirdilər.
Badamdar qəsəbəsinin mərkəzində 9, 7 və 5 mərtəbəli binaların həyətində, 239 nömrəli məktəbin yaxınlığındakı yarmarkada alıcıların tələbatını nəzərə alan Ağdaş, Salyan və digər rayonların fermerləri satışa 12 tondan çox pomidor, xiyar, badımcan, bibər, kartof, soğan, alma, kələm, ət, yumurta və ağartı məhsulları çıxarmışdılar.
Ağdaşdan gəlmiş Cəmil Quliyev pomidorun kiloqramını 30-40 qəpiyə təklif edirdi. Fermer yarmarkalar təşkil ediləndən bəri qəsəbə sakinlərinə 40 tondan çox məhsul satmışdır. O, növbəti yarmarkalarda da iştirak edəcəyini bildirmişdir.
Alıcı Sənubər Qafarovanın sözlərinə görə, yaxınlıqda yaşadığı üçün hər həftə buradan bazarlıq edir. Qiymətlərin münasibliyi, məhsulların keyfiyyəti onu razı salır.
Biləcəri qəsəbəsi, Məlik Aslanov küçəsi, 284 nömrəli orta məktəbin qarşısındakı yarmarkada qiymətləri bazardakından 30-35 faiz ucuz olan meyvə-tərəvəz və süd məhsulları satılırdı. Burada şəhər sakinləri onlara təklif olunan təzə lobyanı, pomidoru, kələmi, xiyarı, badımcanı, bibəri, kökü, şaftalını, qarpızı, digər meyvə-tərəvəzi və süd məhsullarını həvəslə alırdılar.
Kənd Təsərrüfatı Nazirliyinin nümayəndəsi Qalib Hacızadənin verdiyi məlumata görə, Qazax və Ağsu fermerləri satışa 25 tondan çox məhsul çıxarmışlar.
Binəqədi rayonunda 6 nömrəli Bakı Texniki Peşə Liseyinin qarşısındakı yarmarkaya Goranboy, Bərdə və Ağstafalı fermerlər keyfiyyətli kənd təsərrüfatı məhsulları gətirmişdilər.
Hər iki yarmarkada alıcılar onlara nümunəvi xidmət göstərildiyini bildirirdilər.
Yarmarkalar bazar günü davam edəcəkdir.
######
 |
 |
Bölmənin digər xəbərləri
