BAKIDA KƏND TƏSƏRRÜFATI MƏHSULLARININ NÖVBƏTİ SATIŞ YARMARKALARI KEÇİRİLMİŞDİR
AZƏRTAC xəbər verir ki, noyabrın 7-də, müqəddəs Qurban bayramı ərəfəsində Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz və bostan məhsulları çıxarılmışdı.
“Təzə bazar” MMC-nin həyətindəki yarmarkaya bazar günü Sabirabad, Zərdab, Gədəbəy və digər rayonlardan 13 ton müxtəlif çeşidli kənd təsərrüfatı məhsulları gətirilmişdi. Kənd Təsərrüfatı Nazirliyinin nümayəndəsi Fərhad Qəmbərovun sözlərinə görə, şənbə və bazar günləri yarmarkada ümumilkdə 33 ton məhsul satılmışdır. Burada qiymətlər bazardakından 20-25 faiz ucuz olmuş, meyvə, kartof, soğan və ət daha çox alınmışdır.
İki gün ərzində Suraxanıda “Günəş” ticarət mərkəzində və “Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkalarda Balakən, Gədəbəy, Samux, Daşkəsən, Quba, Biləsuvar, Cəlilabad rayonunun fermerləri 70 tondan çox meyvə-tərəvəz və digər kənd təsərrüfatı məhsulları satmışlar. Hər iki yarmarkada qiymətlər bazarla müqayisədə 30-35 faiz ucuz olmuşdur.
Kənd Təsərrüfatı Nazirliyinin nümayəndəsi Mustafa Rüstəmovun verdiyi məlumata görə, müqəddəs Qurban bayramı ərəfəsində əhalinin tələbatı nəzərə alınmış və yarmarkalara qurbanlıq diri heyvanlar da gətirilmişdir.
Metronun “Əhmədli” stansiyasının yaxınlığında, “Azər” ticarət mərkəzindəki yarmarkada şəhər sakinləri bazar günü Salyan, Kürdəmir, Quba, Şəmkir, Ağcabədi, Biləsuvar və Qəbələ rayonlarından gətirilmiş meyvə-tərəvəzi, ağartı və heyvandarlıq məhsullarını həvəslə almışlar. Qurban bayramı münasibətilə yarmarkada əsl məhsul bolluğu yaradılmışdı. Kənd Təsərrüfatı Nazirliyinin nümayəndəsi Namiq Qüdrətov bildirdi ki, buna, alıcıların arzu və təklifləri nəzərə alınmaqla nail olunmuşdur. Burada iki gün ərzində alıcılara 300 tona yaxın kənd təsərrüfatı məhsulları təklif olunmuşdur.
A. Şərifzadə küçəsində, metronun “İnşaatçılar” stansiyasının yaxınlığındakı yarmarkada şıdırğı alver gedirdi. Məhsulların bolluğu və çeşidin müxtəlifliyi alıcıların seçim imkanlarını artırırdı. Diqqəti ən çox cəlb edən məqam satıcı fermerlərlə alıcı paytaxt sakinləri arasında mehriban, səmimi münasibət idi. Kənd Təsərrüfatı Nazirliyinin nümayəndəsi bildirdi ki, artıq Dəvəçi, Qusar, Salyan, Astara, Quba və digər rayonların fermerləri bir gün əvvəl yarmarkaya gətirdikləri 70 tondan çox müxtəlif çeşidli məhsulların 60 faizə qədərini artıq satmışlar.
Fermerlər xüsusilə müqəddəs Qurban bayramı ərəfəsində burada yaradılmış şəraitdən razılıq edirdilər. Salyan rayonundakı “Hacı Camalxan” kəndli fermer təsərrüfatının satıcısı İsa Məmmədov dedi ki, paytaxtda yarmarkaların keçiriməsinə başlandığı ilk gündən burada müxtəlif çeşidli məhsullar satır. Həm satıcılar, həm də alıcılar üçün yaradılan şəraitə söz ola bilməz.
Yarmarkadan əlidolu çıxan alıcıların da deməyə sözləri çox idi. Paytaxt sakinlərindən Solmaz Məmmədova, Musa Qasımov, Əliheydər Şükürov və başqaları məhsulun bolluğundan və qiymətlərin münasibliyindən dönə-dönə razılıq edir, bu nəcib tədbirin təşkilinə görə ölkə rəhbərliyinə minnətdarlıqlarını bildirirdilər.
Biləcəri qəsəbəsi, Məlik Aslanov küçəsi, 284 nömrəli orta məktəbin qarşısındakı yarmarkaya müqəddəs Qurban bayramı münasibətilə bol məhsul gətirilmişdi. Həvəslə bazarlıq edən şəhər sakinləri meyvə-tərəvəzin, bostan və süd məhsullarının qiymətlərinin sərfəli olduğunu bildirirdilər. Qazax və Ağsu rayonlarının fermerləri burada alıcılara 7,3 ton tərəvəz, 4,9 ton meyvə və digər keyfiyyətli məhsullar təklif edirdilər.
Qazax Rayon İcra Hakimiyyətinin nümayəndəsi İman Məmmədovun verdiyi məlumata görə, şənbə və bazar günlərində yarmarkada 20 tonadək kənd təsərrüfatı məhsulları satılmışdır.
Binəqədi rayonunda 6 nömrəli Bakı Texniki Peşə Liseyinin qarşısındakı yarmarkada Bərdə, Goranboy və Ağstafa fermerləri satışa kələm, kartof, alma, soğan, kök və digər meyvə-tərəvəz və heyvandarlıq məhsulları çıxarmışdılar. Həmin məhsullar da alıcılar üçün münasib qiymətlərə satılırdı.
Kənd Təsərrüfatı Nazirliyinin nümayəndəsi Fərhad Eminov bildirmişdir ki, Nərimanov rayonunun Ə.Əliyev küçəsindəki yarmarkada Xaçmaz, İmişli, Tərtər, Tovuz, Daşkəsən, Oğuz, Astara rayonlarının fermerləri şənbə və bazar günləri alıcılara 50 tona yaxın kənd təsərrüfatı məhsulları təklif etmişlər.
Qurban bayramı ilə əlaqədar burada bazar günü də məhsulların çeşidi bol idi.
######
Bölmənin digər xəbərləri
