Yanvarın 5-də Bakı İdman-Konsert Kompleksində qadın komandaları arasında voleybol üzrə olimpiya lisenziya turnirinin təntənəli açılış mərasimi olmuşdur.

Azərbaycan Prezidenti İlham Əliyev və xanımı Mehriban Əliyeva mərasimdə iştirak edirdilər. Salona toplaşanlar Azərbaycan dövlətinin başçısını alqışlarla qarşıladılar.

Turnirin iştirakçıları – Almaniya, Hollandiya, Polşa, Rusiya, İtaliya, Bolqarıstan, Türkiyə və Azərbaycan yığma komandaları idman marşının sədaları altında salona daxil oldular.

Xalqımızın ümummili lideri Prezident Heydər Əliyevin xatirəsinə ehtiram əlaməti olaraq bir dəqiqəlik sükut elan edildi.

Azərbaycan Respublikasının dövlət himni səsləndi.

Turnirin təşkilatçıları Azərbaycan Milli Olimpiya Komitəsi, Gənclər, İdman və Turizm Nazirliyi və respublika Voleybol Federasiyasıdır. Qeyd etmək lazımdır ki, turnirin oyunları “Avrosport” telekanalı, habelə iştirakçı ölkələrin telekanalları ilə yayımlanır.

Azərbaycan və Rusiya komandalarının görüşü başlanmazdan əvvəl hər iki ölkənin dövlət himnləri səsləndi.

Azərbaycan və Rusiya komandalarının oyunu həmişə prinsipial xarakter daşıyır, cünki onlar hücum voleyboluna üstünlük verirlər.

Görüşün ilk dəqiqələrindən voleybolçularımız təşəbbüsə yiyələnərək, ilk texniki fasiləyədək hesabda bir top üstünlüklə irəli çıxdılar. Lakin rəqiblər oyunun qalan hissəsini yüksək səviyyədə keçirərək 25:20 hesabı ilə qalib gəldilər.

Faiq Qarayevin yetirmələri ikinci hissənin əvvəlində bütün xətlərdə yaxşı oyun nümayiş etdirməyə başladılar və hesabda yeddi top fərqlə irəli çıxdılar. Lakin onlar bu üstünlüyü axıradək saxlaya bilməyərək, cüzi fərqlə - 26:24 hesabı ilə uduzdular.

Üçüncü hissə olduqca gərgin keçdi. Rəqiblər növbə ilə hesabda irəli çıxırdılar. Bu mübarizədə Azərbaycan voleybolçuları daha böyük əzmkarlıq göstərərək 28:26 hesabı ilə üstün gəldilər.

Dördüncü hissə Rusiya voleybolçularının üstünlüyü şəraitində keçdi və onlar bunu axıradək əldə saxladılar – 25:20.

Beləliklə, yığma voleybolçularımız qrup turnirinin birinci görüşündə gözəl oyun nümayiş etdirsələr də, daha təcrübəli olan, dünyanın güclü komandalarından biri sayılan Rusiya komandasına uduzdular - 1:3.

Yanvarın 6-da Azərbaycan voleybolçuları Almaniya komandası ilə qarşılaşacaqlar.

X X X

Həmin gün daha iki oyun olmuşdur.

İlk görüş “B” qrupuna daxil olan Hollandiya və Bolqarıstan komandaları arasında keçirildi.

Oyun başlanmazdan əvvəl bu ölkələrin dövlət himnləri səsləndi.

Birinci hissə bolqarların üstünlüyü ilə başa çatdı – 25:17. Komanda ikinci hissədə də yaxşı oyun nümayiş etdirdi – 25:18. Üçüncü hissədə hollandiyalılar bir sıra hallarda rəqibləri ilə bərabər səviyyədə mübarizə aparsalar da, məğlubiyyətə uğradılar – 23:25.

Görüş 3:0 hesabı ilə Borqarıstan voleybolçularının xeyrinə qurtardı.

“B” qrupunda çıxış edən Türkiyə və İtaliya komandalarının görüşü başlanmazdan əvvəl bu ölkələrin dövlət himnləri səsləndi.

Oyun gərgin idman mübarizə şəraitində keçdi. Birinci hissə italyanların qələbəsi ilə sona yetdi – 25:23. İkinci və üçüncü hissələrdə türklər fərqləndilər və dalbadal qələbə qazandılar. Türkiyə komandasında Nəslixan Dəmir və Natalya Xalıqoğlu xüsusilə gözəl oyun göstərdilər.

Dördüncü hissədə gərginlik son həddə çatdı. İtalyanların bütün cəhdlərinə baxmayaraq, Türkiyə yığma komandası qalib gəldi - 3:1.

Yanvarın 6-da Azərbaycan-Almaniya, Rusiya-Polşa, Bolqarıstan-İtaliya görüşləri keçiriləcəkdir.