BAKININ HƏYƏT KOMANDALARI ARASINDA MİNİ-FUTBOL TURNİRİ BAŞA ÇATMIŞDIR
Bakı, 22 oktyabr (AZƏRTAC). Bu gün “Start” idman-əyləncə kompleksində Bakının həyət komandaları arasında mini-futbol turnirinin final görüşləri keçirilmişdir.
Bakı şəhəri İdman və Gənclər Baş İdarəsi və AFFA 2005-2015-ci illərdə Futbolun inkişafına dair Dövlət Proqramını həyata keçirərək uşaqlar arasında sayca 3-cü uşaq futbol turnirini keçirmişlər. Bu il yayda start verilmiş yarışlara 1820 gənc futbolçudan ibarət 182 komanda cəlb edilmişdir.
Turnirin finalında Yasamal və Xətai rayonlarının komandaları qarşılaşmışlar. Gərgin mübarizə şəraitində keçən görüşdə Yasamal rayonunu təmsil edən futbolçular qalib gəlmişlər.
Kubokların və mükafatların təqdim edilməsi mərasiminin əvvəlində ölkəmizin Dövlət Himni səslənmişdir.
Mərasimdə çıxış edən Bakı şəhəri Gənclər və İdman Baş İdarəsinin rəisi Raqif Abbasov, AFFA-nın nümayəndəsi Elxan Əsədov və başqaları ölkəmizdə futbolun kütləviliyini artırmaq üçün bu cür turnirlərin əhəmiyyətini vurğulamışlar.
Regional Futbol Federasiyasının prezidenti, milli futbolun veteranı İsgəndər Cavadov qeyd etmişdir ki, Azərbaycan xalqının ümummilli lideri Heydər Əliyev 70-ci illərdə ölkəmizdə futbolun, o cümlədən uşaq futbolunun inkişafına xüsusi əhəmiyyət verirdi. Həmin illərdə güclü futbolçular məhz bu cür uşaqlar sırasından yetişirdi. Bu gün Prezident İlham Əliyev də Azərbaycanda idmanın bu növünün populyarlaşmasına böyük diqqət yetirir.
İ.Cavadov regionlarda futbolun inkişaf etdirilməsi üçün aparılan işi də qeyd etmişdir.
Sonra turnirin qalibi olmuş komandaya və mükafatçılara Bakı səhəri Gənclər və İdman Baş İdarəsinin kubokları və diplomları, AFFA-nın qiymətli hədiyyələri təqdim edilmişdir.
Bölmənin digər xəbərləri
