BAKININ KİTABXANA-İNFORMASİYA ŞƏBƏKƏSİNDƏ DAHA BİR YENİLİK
AZƏRTAC xəbər verir ki, Mədəniyyət və Turizm Nazirliyinin təşəbbüsü ilə Amerika Birləşmiş Ştatlarının Beynəlxalq Tədqiqatlar və Mübadilələr Şurasının (İREX) qeyri-kommersiya təşkilatı V.Q.Korolenko adına Mərkəzi Şəhər Gənclər Kitabxanası ilə əməkdaşlıq haqqında müqavilə imzalamışdır.
Əməkdaşlıq çərçivəsində İREX təşkilatı əvəzsiz olaraq kitabxanaya 12 ədəd kompyuter dəsti, proyektor, rəqəmsal kamera və sair avadanlıq vermişdir. Bundan əlavə, İREX kitabxananın veb-səhifəsinin yaradılmasına təlim və texniki dəstəyi də təmin edəcəkdir.
Müqavilənin şərtlərinə görə, avqustun 1-dən V.Q.Korolenko adına Mərkəzi Şəhər Gənclər Kitabxanasından internetdə yerləşən məlumat mənbələrinə açıq giriş təmin ediləcək, şəbəkə məlumatının Azərbaycan dilində yayılmasına kömək göstəriləcəkdir. Keçiriləcək təhsil və peşəkar təlimlərdə isə üstünlük gənclərə, təhsil və mədəniyyət işçilərinə, jurnalistlərə, kitabxanaçılara, əlil insanlara, QHT sədrlərinə, dövlət məmurlarına, sahibkarlara, səhiyyə işçilərinə veriləcəkdir. Kitabxanaya müraciət edənlər internetdən və kompyuterlərdən ödənişsiz istifadə edəcəklər.
Bölmənin digər xəbərləri
