Balakənli fermer: Tütünçülüyün inkişafına dövlət dəstəyi təsərrüfatçıların bu sahəyə marağını artırıb
Balakən, 27 avqust, Mustafa Dadaşov, AZƏRTAC
Tütünçülüyün inkişafına dövlət tərəfindən xüsusi diqqətin göstərilməsi, bu sahəyə subsidiyaların ayrılması, tütünün satış qiymətinin artırılması fermerlərin tütün əkininə marağının artmasına səbəb olub. İxrac potensialı yüksək olan bu sahə uzun illər diqqətdən kənarda qalsa da, son illər ölkə rəhbərliyi tərəfindən həyata keçirilən məqsədyönlü tədbirlər nəticəsində tütünçülük yenidən dirçəlməyə başlayıb.
AZƏRTAC-ın bölgə müxbiri xəbər verir ki, dövlətimizin başçısının regionların mövcud iqtisadi potensialından səmərəli istifadə edilməsi ilə bağlı verdiyi tapşırıq və tövsiyələrə uyğun olaraq, son illər şimal-qərb bölgəsi rayonlarında digər ənənəvi sahələr kimi, tütünçülüyün inkişaf etdirilməsi istiqamətində də zəruri tədbirlər həyata keçirilməkdədir.
Balakən rayonunun Talalar kəndindən olan təcrübəli təsərrüfatçı Nüsrət Əsgərov uzun illər qarğıdalıçılıqla məşğul olsa da, bir neçə ildir ki, tütünçülüyə də maraq göstərir. O, ötən il 5 hektar sahədə “Virciniya botaniki” növlü tütün əkib, rayondakı emal məntəqəsinə 50 tonadək yaşıl tütün kütləsi təhvil verib. Dövlətin bu sahəyə dəstəyindən ruhlanan fermer bu il tütün əkini sahələrini genişləndirərək 9 hektara çatdırıb. Fermer indiyədək emal məntəqəsinə 56 ton yaş tütün təhvil verib. İstehsalçı bu il sahələrdən 90 tonadək yaşıl kütlə tədarük etməyi planlaşdırır. Hazırda təsərrüfatda 10 nəfər mövsümi işçi çalışır. Tütün dərimi ilə məşğul olan bu işçilərə gündəlik olaraq 15 manat zəhmət haqqı ödənilir.
Tütünçülüyün çox gəlirli sahə olduğunu bildirən Nüsrət Əsgərov AZƏRTAC-ın bölgə müxbirinə müsahibəsində deyib: “Yazlıq və payızlıq bitkilərin əkininə görə dövlət tərəfindən subsidiyaların ayrılması fermerlərə böyük dəstəkdir. Mən özüm bu il istər tütün, istərsə də qarğıdalı əkininə görə subsidiya almışam. İki il əvvəl rayonda 60 tütünqurutma kamerasından ibarət emal məntəqəsinin fəaliyyətə başlaması biz tütünçülərin işini xeyli asanlaşdırıb. Əvvəllər yetişdirdiyimiz yaşıl tütünü qurutmaq üçün qonşu rayonların emal məntəqələrinə aparırdıq. Bu isə vaxt itkisinə, əlavə xərclərə və məhsulun keyfiyyətinin aşağı düşməsinə səbəb olurdu. Emal məntəqəsinin açılması gəlirlərimizin artmasına da öz təsirini göstərir”.
Təsərrüfat rəhbəri bu il, eyni zamanda, 50 hektar sahədə qarğıdalı bitkisi də əkib. Əkin sahələrinə göstərilən yüksək aqrotexniki qulluq tədbirləri nəticəsində yaxşı məhsul yetişib. Fermerin sözlərinə görə, qarğıdalı yığımına sentyabrın ortalarında başlanılacaq.
Bölmənin digər xəbərləri
