BALKAN YARIMADASINDA SABİTLİK NAMİNƏ ƏMƏKDAŞLIQ
Türkiyə, Bolqarıstan və Rumıniya Balkan yarımadasında terrorizmlə və mütəşəkkil cinayətkarlıqla mübarizə sahəsində, sabitliyin təmin olunması üçün fəal əməkdaşlıq edəcəklər. Bu barədə qərar üç dövlətin başçılarının mayın 15-də Türkiyənin Çeşmə kurort şəhərində başa çatan görüşündə qəbul olunmuşdur.
Türkiyə Prezidenti Əhməd Necdət Sezər “Balkan zirvə görüşü”nün yekunlarını açıqlayaraq, üç ölkənin qarşılıqlı fəaliyyəti ilə bağlı məsələlərin müzakirə edildiyini və bunun onların xalqlarının və bütün Balkan bölgəsinin maraqlarına uyğun olduğunu bildirmişdir. Prezident demişdir ki, Ankara Sofiya və Buxarestin NATO-ya daxil olmaq səylərini dəstəkləyir və bunun üçün səylərini əsirgəməyəcəkdir.
İTAR-TASS-ın verdiyi xəbərə görə, Çeşmə görüşündə təbii fəlakətlərin nəticələrinin aradan qaldırılmasında və fövqəladə hallarda üç ölkənin əməkdaşlığı haqqında protokol imzalanmışdır. Azad ticarət üçün birgə zonalar və nəqliyyat dəhlizləri yaradılması barədə razılaşma da əldə edilmişdir.
Bölmənin digər xəbərləri
