BAM-IN ANQOYA STANSİYASINDAKI VAĞZALINA ULU ÖNDƏR HEYDƏR ƏLİYEVİN ADI VERİLMİŞDİR
AZƏRTAC-ın xüsusi müxbiri xəbər verir ki, iyulun 18-də Baykal-Amur magistralında Şərqi Sibir dəmir yolunun Anqoya stansiyasındakı vağzala Azərbaycan xalqının ümummilli lideri Heydər Əliyevin adının verilməsi münasibətilə təntənəli mərasim keçirilmiş, burada ulu öndərin xatirə lövhəsi açılmışdır.
Buryatiyanın Severobaykalsk rayonunda yerləşən Anqoya stansiyasına qatarla gələn qonaqları təntənəli mərasim iştirakçıları duz-çörəklə qarşılamışlar. Mərasimdə Azərbaycan Respublikası Prezidentinin İcra Aparatının ictimai-siyasi məsələlər şöbəsinin müdiri Əli Həsənov, Azərbaycanın nəqliyyat naziri Ziya Məmmədov, ölkəmizin Rusiyadakı səfiri Polad Bülbüloğlu, Azərbaycan Dövlət Dəmir Yolunun rəisi Arif Əsgərov, Rusiyanın nəqliyyat naziri İqor Levitin, “Rusiya Dəmir Yolu” ASC-nin prezidenti Vladimir Yakunin, digər rəsmi şəxslər, ictimaiyyətin nümayəndələri, gənc nəqliyyatçılar iştirak etmişlər.
Ötən əsrin 1980-ci illərində çoxsaylı qəsəbə və yaşayış məskənlərinin salındığı Baykal-Amur magistralının tikintisində xüsusi xidmətləri olan ulu öndər Heydər Əliyevin adının bu vağzala verilməsini və xatirəsinin əbədiləşdirilməsini yüksək qiymətləndirən mərasim iştirakçıları o vaxtlar bu nəhəng dəmir yolu xəttinin tikintisində Azərbaycandan da çoxlu inşaatçıların və mütəxəssislərin çalışdığını bildirmişlər. Rusiya Federal Məclisi Federasiya Şurası sədrinin müavini Svetlana Orlova Anqoya stansiyasına dünya şöhrətli siyasi xadim Heydər Əliyevin adının verilməsini tarixi hadisə adlandırmışdır. O demişdir ki, mən bu gün bu tribunadan təkcə Federasiya Şurası sədrinin müavini kimi deyil, həm də Baykal-Amur Magistralı ilə ilk qatarı idarə etmiş dəmiryolçu Yuri Pavlovun qızı kimi çıxış edirəm. Bu gün bu vağzala Heydər Əliyevin adının verilməsi olduqca tarixi andır, çünki SSRİ Nazirlər Soveti sədrinin birinci müavini işlədiyi dövrlərdə Heydər Əliyev BAM-ın tikintisi üzrə yüksək səviyyəli komissiyaya rəhbərlik etmişdir. Svetlana Orlova vurğulamışdır ki, Heydər Əliyev burada nəinki yüksək vəzifəli bir şəxs, həmçinin sadə və səmimi bir insan kimi dərin məhəbbət qazanmışdı.
Mərasimdə dostlarla birgə olmaqdan şərəf duyduğunu söyləyən “Rusiya Dəmir Yolu” ASC-nin prezidenti Vladimir Yakunin görkəmli siyasi xadim Heydər Əliyevin xatirəsinin əbədiləşdirilməsinin bu region üçün xüsusi əhəmiyyət daşıdığını bildirmiş və o illərlə bağlı xatirələrini bölüşmüşdür. O demişdir ki, Heydər Əliyev BAM-ın tikintisinə misilsiz töhfələr vermişdir. Bu magistral hazırda dirçəliş dövrünü yaşayır. Bir müddət əvvəl ikinci Korşunovski tuneli istifadəyə verilmişdir.
Azərbaycanın nəqliyyat naziri Ziya Məmmədov Anqoya qəsəbəsində Azərbaycan xalqının ümummili lideri Heydər Əliyevin xatirəsinin əbədiləşdirilməsi münasibətilə keçirilən tədbirin iştirakçılarına dövlətimizin başçısı İlham Əliyevin salamlarını çatdırmışdır. Nazir Azərbaycan və Rusiya prezidentlərinin səyləri sayəsində görülən işlərdən danışmış, xalqlarımız arasında dostluq, qonşuluq əlaqələrinin daha da inkişaf etdiyini və qarşılıqlı münasibətlərin strateji tərəfdaşlıq səviyyəsinə yüksəldiyini xüsusi vurğulamışdır.
Rusiya Federasiyasının nəqliyyat naziri İqor Levitin Anqoyanı ümid stansiyası adlandırmış və buradakı vağzala görkəmli siyasi xadim Heydər Əliyevin adının verilməsinin, Şərqi Sibirdə onun xatirəsinin əbədiləşdirilməsinin tarixi hadisə olduğunu söyləmişdir. İ.Levitin demişdir ki, BAM dostluğumuzun rəmzidir.
Rusiya Federasiyası Buryatiya Respublikasının Prezidenti Vyaçeslav Naqovitsın ötən əsrin 1980-ci illərində Baykal-Amur Magistralı layihəsinin reallaşmasında Heydər Əliyevin əvəzsiz xidmətlərinin Rusiya xalqları tərəfindən heç zaman unudulmayacağını bildirmişdir.
Təntənəli mərasimdə çıxış edən Azərbaycan Dövlət Dəmir Yolunun rəisi Arif Əsgərov, “Rusiya Dəmir Yolu” ASC-nin vitse-prezidenti Salman Babayev və ölkəmizin Rusiyadakı səfiri Polad Bülbüloğlu Şərqi Sibiri ram edən insanlara hörmət və ehtiramlarını ifadə etmişlər. Azərbaycandan çox-çox uzaqlarda - Sibirdə xalqımızın dahi oğlu Heydər Əliyevin adını daşıyan vağzalın xeyirxahlığa və dostluğa xidmət etməsindən şərəf duyduqlarını söyləmişlər.
Sonra ümummilli lider Heydər Əliyevin adını daşıyan dəmir yolu vağzalının rəmzi açılışı olmuşdur. Vağzal binasının memarlığında milli üslubdan istifadə edilmiş, binaya Cənubi Qafqazdan gətirilmiş ağ mərmərdən üz çəkilmişdir. Bildirilmişdir ki, BAM-ın Ulkan və Anqoya qəsəbələrini Azərbaycandan gəlmiş inşaatçı dəstələri tikmişlər.
Tədbir Azərbaycan incəsənət ustalarının konsert proqramı ilə davam etmişdir. Sonra mərasim iştirakçıları ulu öndər Heydər Əliyevin adını daşıyan dəmir yolu vağzalının foyesində Baykal-Amur magistralının və Anqoya stansiyasının tarixini əks etdirən muzeylə tanış olmuş, burada rejissor Vaqif Mustafayevin ümummilli liderin BAM-ın tikintisindəki xidmətlərindən bəhs edən sənədli filminə baxmışlar.
Rusiya Federasiyasının nümayəndə heyəti tərəfindən Azərbaycan Respublikasının nümayəndə heyətinə xatirə hədiyyəsi təqdim olunmuşdur.
Bölmənin digər xəbərləri
