“BANK OF BAKU” ASC-NİN XALİS MƏNFƏƏTİ 238 FAİZ ARTMIŞDIR
Cari ilin ikinci rübündə “Bank of Baku” Açıq Səhmdar Cəmiyyətinin gəlir vergisi tutulduqdan sonra xalis mənfəəti 4,57 milyon manata çatmışdır.
Bankdan AZƏRTAC-a bildirmişlər ki, xalis mənfəət ötən ilin müvafiq dövrü ilə müqayisədə 238 faiz artmışdır. Ümumi gəlirlər 120 faiz artaraq 19,37 milyon manata, xərclər isə (gəlir vergisi nəzərə alınmadan) 12,58 milyon manata çatmışdır. Yüksək gəlirlilik sayəsində ROA - vergi tutulduqdan sonra xalis mənfəət/dövr ərzində aktivlərin orta məbləği/ 2007-ci ildəki 2,58 faizdən 5,57 faizə yüksəlmişdir. ROE - vergi tutulduqdan sonra xalis mənfəət/ dövr ərzində ümumi kapitalın orta məbləği/ isə ötənilki 21,94 faizlə müqayisədə 42,67 faiz artmışdır.
ASC-nin aktivləri 2007-ci ilin müvafiq göstəricisinə nisbətən 74 faiz artaraq 176,2 milyon manat təşkil etmişdir. Kredit portfeli 144,17 milyon manata çatmışdır.
İkinci rübün sonu üçün bank 138,02 milyon manat, başqa sözlə, ötən ilin müvafiq dövründəkindən 78 faiz çox vəsait cəlb etmişdir. Müddətli depozitlərin məbləği 61,05 milyon manat - cari ilin əvvəlinə olan göstəricidən 40 faiz artıq olmuşdur.
Ödənmiş nizamnamə fondu 6,8 milyon manat səviyyəsində qalmış, ümumi kapital isə 23,57 milyon manatı keçmişdir.
2008-ci il iyunun sonuna bankın aktiv kartlarının sayı 27871 ədəd təşkil etmiş, onların 22891-i kredit kartlarının, 4980-i isə debet kartlarının payına düşmüşdür. Hazırda bankın POS-terminallarının sayı 257-ə, ATM-bankomatlarının sayı isə 24-ə çatmışdır. Bankın 15 filialı, 1 ekspress məntəqəsi, habelə Sumqayıtda 1 bölməsi vardır.
