Bayrağımız qürurumuzdur
Ucar, 09 noyabr (AZƏRTAC). Bayraq Günü Ucar rayonunda silsilə tədbirlərlə qeyd olunmuşdur.
AZƏRTAC xəbər verir ki, Ucar şəhərindəki, Bayraq meydanında təşkil olunan tədbirdə xalqımızın zəngin tarixi keçmişindən, dövlətçilik ənənələrindən söz açılmış, milli dəyərlərimizə, dövlət atributlarımıza göstərilən həssas münasibətdən danışılmışdır.
Qeyd edilmişdir ki, Azərbaycan ərazisində yaradılmış dövlətlərin özünəməxsus atributları olsa da, bütöv Azərbaycanın ilk Dövlət Bayrağı Xalq Cümhuriyyəti dövründə - 1918-ci il noyabrın 9 da təsis olunmuşdur. Türk mədəniyyətinin, müsəlman sivilizasiyasının və müasir Avropanın demokratik dəyərlərinin əsas simvolu olan milli bayrağımız uzun fasilədən sonra 1990-cı il noyabrın 17 da ulu öndər Heydər Əliyevin sədrliyi ilə keçirilən Naxçıvan Ali Məclisinin sessiyasında yenidən qaldırılmışdır.
Çıxış edən natiqlər ölkəmizin bugünkü inkişafından, Prezident İlham Əliyevin rəhbərliyi ilə Azərbaycanın dünyada layiqli yer tutmasından danışmışlar.
Bayraq Gününə həsr olunmuş tədbir mədəniyyət işçilərinin hazırladıqları bayram konserti ilə davam etdirilmişdir.
Bölmənin digər xəbərləri
