“Bayraqdar Türanə”nin unudulmaz görüşü - Heydər Əliyevin diqqətini çəkən gənc qızın xatirəsi
Balakən, 10 may, AZƏRTAC
Bu gün Ulu Öndər Heydər Əliyevin anadan olmasının 103-cü ildönümüdür.
Dahi şəxsiyyət haqqında istər keçmiş sovet dövründə, istərsə də müstəqillik illərində çox yazılıb, saysız-hesabsız xatirələr danışılıb. Heydər Əliyevin sadə insanlarla səmimi görüşləri, rayonlara səfərləri zamanı kənd adamları ilə etdiyi maraqlı söhbətlər bu gün də böyük ehtiramla xatırlanır. Onun insanlara diqqət və qayğı ilə yanaşması tarixdə iz qoyan məqamlardan biri olub.
AZƏRTAC-ın bölgə müxbiri xəbər verir ki, belə yaddaqalan hadisələrdən biri 2002-ci ilin noyabrında Şəki Olimpiya İdman Kompleksinin açılışı zamanı yaşanıb. Üzərindən illər keçsə də, həmin anlar yaddaşlarda yaşayır. O görüşün şahidi isə bu gün çoxlarının “Bayraqdar Türanə” kimi tanıdığı Balakən sakini, tibb işçisi Türanə Məmmədovadır.
Hadisə 2002-ci ildə Şəkidə baş verir. Şəki Olimpiya İdman Kompleksinin açılış mərasiminə Ulu Öndər Heydər Əliyev də qatılıb. Minlərlə insan Prezidentlə görüşmək üçün meydana toplaşıb. Heydər Əliyev çıxışında ölkədə və dünyada baş verən hadisələrdən, aparılan quruculuq işlərindən danışırdı. Bir neçə saat davam edən tədbir zamanı o, adəti üzrə insanlarla sanki canlı ünsiyyət qururdu.
Məhz belə anlardan birində onun diqqətini izdiham içində əlindəki Azərbaycan Bayrağını bir an belə aşağı endirməyən balacaboy bir qız cəlb edir. Həmin qız Balakənin Qazma kəndindən olan Türanə Məmmədova idi. O illərdə Türanə Şəki Tibb Texnikumunun ikinci kurs tələbəsi idi.
Türanə Məmmədova həmin günü hər dəfə xatırlayanda duyğulandığını deyir: “Biz tələbələr Ulu Öndərin gəlişini səbirsizliklə gözləyirdik. Hamımız üçün bu, əsl bayram idi. Prezidentimizi görmək böyük sevinc idi. Əlimizdə Azərbaycanın müstəqilliyinin rəmzi olan üçrəngli bayraqlarla onu qarşılamaq isə böyük şərəf sayılırdı.
Texnikumda keçirilən tədbirlərdə fəal tələbə olduğuma görə direktorumuz bəzi işləri mənə tapşırardı. Həmin gün də bayraqları və plakatları tələbələrə paylamağı mənə həvalə etmişdi. Bayraqları payladım, birini də özüm götürüb dalğalandırmağa başladım”.
Türanə xanım deyir ki, həmin gün sanki daxilində xüsusi bir inam və güc hiss edirdi. Qolları yorulsa da, bayrağı heç kimə vermək istəmirdi. Onun sözlərinə görə, Heydər Əliyevin Şəkiyə gələcəyini eşidəndən qəlbində bir arzu yaranmışdı - Ulu Öndərlə görüşmək, ona yaxın olmaq. Lakin meydandakı minlərlə insanı görəndə düşünürdü ki, sevgisini yalnız əlində tutduğu bayraq vasitəsilə ifadə edə biləcək.
Saatlarla bayrağı əlindən yerə qoymayan Türanənin bu davranışı Heydər Əliyevin də diqqətindən yayınmır.
“Evdən çıxanda elə bil ürəyimə dammışdı ki, bu gün Prezidentimizlə görüşəcəyəm. Amma belə bir şeyə heç kim inanmırdı. Minlərlə insanın arasında mən də tələbələrin içində dayanmışdım, əlimdə böyük bir bayraq vardı. Bir müddət sonra hiss etdim ki, Prezidentimiz mənə baxır. Öz-özümə deyirdim ki, yəqin mənə elə gəlir. Amma sonra Ulu Öndər dedi: “O camaatın içindəki gənc qız bayrağı əlində tutub, külək onu o tərəfə-bu tərəfə aparır, amma yerə qoymur. Qızım, səni görürəm, gözəl qızsan”.
Biz bir-birimizə əl işarəsi ilə salam verdik. Sonra insanlar mənə yol açdılar və Prezidentimizin yanına getdim. O, mənimlə görüşdü, Azərbaycan Bayrağını öpüb alnına qoydu. Bu an həyatımın ən unudulmaz günü kimi yaddaşıma həkk olundu”.
Türanə Məmmədova həmin görüşü həyatının ən böyük xoşbəxtliklərindən biri hesab edir. O bildirir ki, Ulu Öndərə olan sevgi və ehtiramını övladlarına da aşılayıb. Hazırda çalışdığı Balakən Rayon Mərkəzi Xəstəxanasında keçirilən tədbirlərdə həmin xatirəni tez-tez danışır.
“Həmin görüşdən bir müddət sonra Ulu Öndəri itirdik. O vaxtdan bəri onun doğum və anım günlərində Heydər Əliyev mərkəzlərini, Bayraq muzeylərini ziyarət edirəm. İmkan olduqda Bakıda məzarını da ziyarət edirəm. Prezidentimizlə görüş həyatımda silinməz iz qoyub. Mən çox xoşbəxtəm ki, Ulu Öndər Heydər Əliyevi görmüş və onunla görüşmüşəm”, - deyə Türanə xanım bildirir.
Müxbir - Rasim İslamoğlu
Bölmənin digər xəbərləri
