Hikmət Babaoğlu: Ulu Öndərin dövlətçilik irsi vahid dövlətçilik konsepsiyasıdır
Bakı, 10 may, AZƏRTAC
Bu gün Ümummilli Lider Heydər Əliyev haqqında danışarkən, eyni zamanda, onun zəngin dövlətçilik irsindən də bəhs edirik. Ulu Öndər Heydər Əliyevin dövlətçilik irsi siyasi, mədəni, sosial və institusional istiqamətləri özündə birləşdirən vahid dövlətçilik konsepsiyasıdır. Dövlətçilik isə hər bir xalqın tarixi inkişaf prosesində əldə etdiyi ən mühüm nailiyyətlərdən biridir. Çünki xalq yalnız siyasi baxımdan yetkinləşdikdən və təşkilatlanmağı bacardıqdan sonra öz dövlətini yarada bilir.
Bu fikirləri AZƏRTAC-a açıqlamasında Milli Məclisin deputatı Hikmət Babaoğlu bildirib.
O qeyd edib ki, çoxəsrlik milli dövlətçilik tariximizin ən mürəkkəb mərhələsində - 1990-cı illərin əvvəllərində Azərbaycan dövlətçiliyi ciddi təhlükə ilə üz-üzə qalmışdı. Həmin dövrdə Heydər Əliyev yenidən milli dövlətçiliyimizi siyasi baxımdan təşkilatlandırdı, onun iqtisadi və hüquqi əsaslarını yaratdı, eyni zamanda, ölkənin daxili və xarici siyasət strategiyasını müəyyənləşdirdi. Tarixi təcrübə göstərdi ki, müstəqillik dövrü tariximizi təhlil edərkən məhz bu quruculuq prosesinin Azərbaycanın gələcək inkişafının əsasını təşkil etdiyini görürük
“Bu gün qalib və qüdrətli Azərbaycan məhz Heydər Əliyevin təməlini qoyduğu Azərbaycan dövlətidir. Qalib Azərbaycan Heydər Əliyevin yaratdığı hüquqi, siyasi və ideoloji əsaslar üzərində qurulub. Milli həmrəyliyi, dövlətçilik şüurunu və mübarizlik tariximizi öz fəaliyyətində əks etdirən bu təşkilatlanma Azərbaycanın güclənməsini təmin etdi. Azərbaycanın bu gün beynəlxalq münasibətlər sistemində tutduğu yer, artan nüfuzu və əldə etdiyi tarixi Zəfər də məhz Ulu Öndər Heydər Əliyevin müəyyən etdiyi siyasi kursun nəticəsidir. Bu siyasət Prezident İlham Əliyev tərəfindən müasir strateji tələblərə uyğun şəkildə inkişaf etdirilərək yeni mərhələyə transformasiya olunub. Bu gün biz Böyük Qayıdışdan, ərazi bütövlüyümüzün və suveren hüquqlarımızın bərpasından, Azərbaycanın yeni tarixi perspektivlərindən danışarkən mütləq Heydər Əliyevin dövlətçilik irsinə nəzər salmalıyıq. Çünki bütün bu nailiyyətlər Heydər Əliyev ideyaları və onun formalaşdırdığı dövlətçilik ənənələri sayəsində mümkün olub”, - deyə Milli Məclisin deputatı vurğulayıb.
O bildirib ki, Heydər Əliyevin anım və xatirə günləri yalnız tarixi hadisə kimi qeyd edilmir, eyni zamanda, müstəqil Azərbaycan dövlətçiliyinin inkişaf mərhələlərinin öyrənilməsi baxımından mühüm əhəmiyyət daşıyır. Çünki Heydər Əliyev adı Azərbaycanda müstəqil dövlət anlayışı ilə assosiasiya olunur. Bu isə Azərbaycan xalqının dövlətçilik tarixinin ən mühüm mərhələlərindən birini təşkil etməklə yanaşı, daha güclü gələcəyin və inkişaf etmiş Azərbaycanın əsasını müəyyən edir.
Müxbir - Səbinə Əlizadə
Bölmənin digər xəbərləri
