BDU-da “Diplomatiya saatı” layihəsinin ilk qonağı Azərbaycanın Keniyakı səfiri olub
Bakı, 26 may, AZƏRTAC
Bakı Dövlət Universiteti (BDU), Xarici İşlər Nazirliyi, “BDU könüllüləri” və “Diplomatiya könüllüləri” təşkilatlarının birgə reallaşdırdığı “Diplomatiya saatı” layihəsinin ilk qonağı Azərbaycanın Keniya Respublikasındakı səfiri, ölkəmizin BMT-nin Nayrobi şəhərindəki bölməsində daimi nümayəndəsi Sultan Hacıyev olub.
Bu barədə AZƏRTAC-a BDU-dan məlumat verilib.
BDU-nun sosial məsələlər, tələbələrlə iş və ictimaiyyətlə əlaqələr üzrə prorektoru Əliş Ağamirzəyev Bakı Dövlət Universitetinin ölkənin yüksəkixtisaslı kadrlarla təmin edilməsində vacib rolunu diqqətə çatdırıb. O bildirib ki, BDU-nun yaxın əməkdaşlıq etdiyi dövlət qurumlarından biri də Xarici İşlər Nazirliyidir. Əliş Ağamirzəyev Sultan Hacıyevin həm dövlət qulluqçusu, həm də beynəlxalq mülki xidmət əməkdaşı kimi 28 ildən artıq peşəkar təcrübəyə malik olduğunu bildirib. Qeyd edib ki, Sultan Hacıyev fəaliyyəti dövründə bir sıra strateji təşəbbüs və missiyalara rəhbərlik edib. O, xüsusilə postmünaqişə dövründə yenidənqurma, bərpa və minatəmizləmə istiqamətləri üzrə həm ikitərəfli, həm də çoxtərəfli beynəlxalq tərəfdaşlıq proqramlarının həyata keçirilməsinə töhfə verib. Səfir həm də Azərbaycanı beynəlxalq platformalarda, o cümlədən COP və WUF sessiyaları daxil olmaqla ətraf mühit, şəhərsalma və inkişaf mövzularına həsr olunan mühüm tədbirlərdə təmsil edib. Beynəlxalq mülki xidmət sahəsindəki fəaliyyəti müddətində Sultan Hacıyev həm BMT-nin baş qərargahında, həm də Əfqanıstan, Liviya, İraq, Somali kimi mürəkkəb fövqəladə vəziyyət hökm sürən müxtəlif ölkələrdə çalışıb. Azərbaycanın uğurlu dövlət idarəçilik örnəklərinin oxşar inkişaf problemlərini yaşayan ölkələr üçün nümunə kimi göstərilməsini fəal şəkildə təbliğ edib. Prorektor belə zəngin təcrübəyə malik diplomatlarla görüşlərin tələbələr üçün karyera quruculuğu baxımından çox faydalı olduğunu diqqətə çatdırıb.
Səfir Sultan Hacıyev məzunu olduğu BDU-da “Diplomatiya saatı” layihəsinin ilk qonağı olmaqdan qürur duyduğunu bildirib. O, tələbələrə diplomatik xidmətin əsas prinsipləri, üstün cəhətləri və qarşıya çıxan problemlər, bu sahədə uğur qazanma yolları, dünyada böhran hallarının idarə olunması, Azərbaycanın bir çox ölkələrə, o cümlədən Keniyaya göstərdiyi humanitar dəstək barədə məlumat verib, öz təcrübəsini bölüşüb. O qeyd edib ki, Azərbaycan BMT Təhlükəsizlik Şurasının qətnamələrini heç bir dövlətin dəstəyi olmadan özü icra edərək torpaqlarını azad edən yeganə ölkədir. Ölkəmiz həm də iqlim və şəhərsalma gündəliyi sahəsində aparıcı yer tutur: “Azərbaycanın postmünaqişə dövründə azad edilmiş ərazilərdə həyata keçirildiyi bərpa və yenidənqurma siyasəti bütün dünya ölkələri tərəfindən böyük maraqla izlənilir. Azərbaycan “yumşaq güc”ü çox effektiv şəkildə tətbiq edən ölkələrdən biridir. Bunu artıq bir çox ölkələr etiraf edirlər. Son illərdə bizim milli diplomatiyamız misilsiz uğurlara imza atıb. Yaxşı, uğurlu diplomat olmaq üçün Vətənə bağlılıq əsas şərtlərdən biridir”.
Sonra qonaq tələbələrin çoxsaylı suallarını cavablandırıb.
Bölmənin digər xəbərləri
