BERLİNDƏ İKİ BOMBA ZƏRƏRSİZLƏŞDİRİLMİŞDİR
AZƏRTAC-ın xüsusi müxbiri xəbər verir ki, sentyabrın 22-də Berlinin ətraf yaşayış məntəqəsi Oranienburqda İkinci Dünya müharibəsindən qalmış iki nəhəng bomba zərərsizləşdirilmişdir. Hər birinin çəkisi 250 kiloqram olan bombalar zavod həyətində tikinti-qazma işləri aparılarkən aşkar edilmişdir. 50 il müddətində çürüyərək partlama anını gözləyən bombaların zərərsizləşdirilməsi əməliyyatı 9 saat davam etmişdir. Səhər saat 8-dən 17-dək ətrafdakı evlərdən 6500 sakin, 7 məktəb kollektivi, çoxsaylı idarə və müəssisə, iki ticarət mərkəzi, 200 çarpayılıq bir xəstəxana təhlükəsiz ərazilərə köçürülmüşdür. Onlar yalnız bombaların zərərsizləşdirilməsi əməliyyatı bitdikdən sonra öz yerlərinə qaytarılmışlar. Zərərsizləşdirmə əməliyyatları davam edən müddətdə Berlin-Oranienburq istiqamətində metronun, elektrik qatarlarının və digər nəqliyyat vasitələrinin hərəkəti 9 saat müddətinə dayandırılmışdır.
Bölmənin digər xəbərləri
