BERTI FOQTS AZƏRBAYCAN YIĞMASI İLƏ TANIŞLIĞI APRELİN 13-NƏ NƏZƏRDƏ TUTUR
AZƏRTAC xəbər verir ki, Azərbaycan yığmasının baş məşqçisi Berti Foqts yeni vəzifəsindən nə gözlədiyindən söhbət açaraq demişdir: “Biz əvvəlcə öyrənməliyik. Söhbət Almaniya ilə görüşün prinsipiallığından getmir. Azərbaycan üçün həmvətənlərimlə görüşdən daha vacib oyunlar vardır. Azərbaycan yığması Rusiya komandası ilə bir qrupa düşmüşdür. Azərbaycanda hesab edirlər ki, bu komanda ilə görüşlərdə gözlənilməz nəticəyə nail olaraq, özünü göstərmək mümkündür. Dünyanın reytinq cədvəlində 119-cu yerdə olan bir yığmanın qarşısına ciddi vəzifələr qoymaq olmaz. Almaniya və Rusiyanı qabaqlayıb, qrupda lider olmaq barədə düşünməkdənsə, loto oynamaq yaxşıdır. Burada söhbət başqa məsələdən gedir. Məsələn, Şotlandiyada elə bir şərait vardı ki, mən gənclərdən ibarət komanda yarada bildim və hazırda bu komanda kifayət qədər uğurla oynayır. Azərbaycanda da gənc rəhbərlik futbolun inkişafına təkan vermək istəyir. Onların əsas məqsədi mənim təcrübəmdən istifadə etməkdir. Komanda ilə tanışlıq üçün aprelin 13-də Azərbaycana yola düşəcəyəm”.
Bölmənin digər xəbərləri
