BERTİ FOQTS: “GƏRGİN TƏLİM-MƏŞQ TOPLANIŞI KEÇMİŞİK”
Bakı, 13 oktyabr (AZƏRTAC). Oktyabrın 13-də AFFA-nın inzibati binasında Azərbaycan milli komandasının baş məşqçisi Berti Foqtsun mətbuat konfransı keçirilmişdir.
Konfransın əsas mövzusu oktyabrın 14-də Rusiya komandası ilə keçiriləcək oyuna hazırlıq olmuşdur.
Almaniyalı mütəxəssis Rusiya komandasının güclü rəqib olduğu üçün, onlara qarşı gərgin təlim-məşq toplanışı keçdiklərini qeyd etmişdir. “Qus Hiddinki yaxşı tanıyıram. Mənim fikrimcə o, oyuna gənc futbolçuları buraxacaq”, - deyə baş məşqçi əlavə etmişdir.
Foqts yığmamızın heyətində zədəli futbolçulardan da danışdı. Onun sözlərinə görə, Rəşad Sadıqov və Saşa Yunisoğlu ilə yanaşı, Vüqar Nadirovla Elvin Məmmədov da zədəlidir. Vüqar və Elvinin alternativi olaraq Cavid Hüseynov heyətə dəvət oluna bilər. “Bu barədə axşam qərar veriləcək”, - deyə o əlavə etmişdir.
Samir Abbasovun artıq komandaya qayıtdığını deyən baş məşqçi onun sabahkı görüşdə yenə də kapitan olacağını diqqətə çatdırmışdır.
######
Bölmənin digər xəbərləri
