ELM VƏ TƏHSİL
Bəxtiyar Əliyev: Sağlamlıq imkanları məhdud şəxslərin təhsil almaqda əhatə dairəsi genişlənir
![Bəxtiyar Əliyev: Sağlamlıq imkanları məhdud şəxslərin təhsil almaqda əhatə dairəsi genişlənir](/files/2024/2/1200x630/17168072555976924059_1200x630.jpg)
Bakı, 27 may, AZƏRTAC
Müzakirə olunan qanun layihəsi xüsusi təhsil müəssisələrinin fəaliyyətinin ümumi təhsil müəssisələrinin nümunəvi nizamnaməsi çərçivəsində tənzimlənməsini özündə ehtiva edir.
Dəyişikliklə, sağlamlıq imkanları məhdud şəxslərin təhsil almaqda əhatə dairəsi genişlənir.
AZƏRTAC xəbər verir ki, bunu Milli Məclisin Elm və təhsil komitəsinin sədri Bəxtiyar Əliyev komitənin mayın 27-də keçirilən iclasının gündəliyində müzakirəyə çıxarılan “Sağlamlıq imkanları məhdud şəxslərin təhsili (xüsusi təhsil) haqqında” qanuna dəyişikliklərlə bağlı qanun layihəsinin təqdimatı zamanı deyib.
Komitə sədri bildirib ki, sənəd “Publik hüquqi şəxslər haqqında” Azərbaycan Respublikasının 2015-ci il 29 dekabr tarixli 97-VQ nömrəli Qanununun tətbiqi barədə” Azərbaycan Respublikası Prezidentinin 2016-cı il 3 fevral tarixli 759 nömrəli Fərmanına uyğun olaraq hazırlanıb.
Qeyd edək ki, qanun layihəsinə görə, qanunun 13.4-cü maddəsi ləğv edilir. Eyni zamanda, 20.1-ci maddədə dəqiqləşdirmə məqsədilə “fiziki çatışmazlığı, əqli və (və ya) psixi ləngimələri olanlar” ifadəsinin “sağlamlıq imkanları məhdud olan şəxslər” ifadəsi ilə əvəz edilməsi nəzərdə tutulur və bununla da sözügedən terminin qanunun adı ilə uyğunlaşdırılması təmin olunur.