BEYLƏQANDA MƏRKƏZİ STADİONUN AÇILIŞI OLMUŞDUR
Beyləqan, 12 oktyabr (AZƏRTAC). Beyləqan rayonunda 3500 yerlik mərkəzi stadionun əsaslı təmirdən sonra açılışı olmuşdur. Açılış mərasimində Beyləqan və Xocavənd rayon İcra Hakimiyyətlərinin (RİH) başçıları İrşad Əliyev və Eyvaz Hüseynov, Milli Məclisin deputatı Səfər Məmmədov, Regional Futbol Federasiyasının prezidenti İsgəndər Cavadov, vitse-prezidenti Maşallah Əhmədov, Həvəskarlar Futbol Federasiyasının baş katibi Füzuli Nəcəfov, Mərkəzi Regional Futbol Federasiyasının prezidenti Nadir Quliyev, “N” saylı hərbi korpusun təmsilçisi general-mayor Mahmud Həmzəyev iştirak etmişlər.
Mərasim iştirakçıları əvvəlcə Heydər Əliyev adına parkda ümummilli liderin abidəsini ziyarət etmiş, önünə çiçək dəstələri düzmüşlər.
Beyləqan RİH-nin başçısı İrşad Əliyev və Regional Futbol Federasiyasının prezidenti İsgəndər Cavadov rayon sakinlərini, futbolçuları stadionun istifadəyə verilməsi münasibətilə təbrik etmiş, idmana göstərilən dövlət qayğısından, son dövrlər ölkədə, o cümlədən Beyləqan rayonunda idmanın inkişafından danışmışlar.
Sonra Ağcabədi və Beyləqan rayon futbolçuları arasında yoldaşlıq görüşü keçirilmişdir.
Bölmənin digər xəbərləri
