BEYNƏLXALQ KONVENSİYALARA QOŞULMAQ BARƏDƏ QANUNLAR QƏBUL EDİLMİŞDİR
İqtisadi siyasət daimi komissiyasının sədri Ziyad Səmədzadə isə “Beynəlxalq dəniz gəmiçiliyinin asanlaşdırılması haqqında” Konvensiyaya qoşulmaq barədə”, “Xilasetmə haqqında” Beynəlxalq Konvensiyaya qoşulmaq barədə”, “Dənizçilərin şəxsiyyət sənədləri haqqında” 185 saylı Konvensiyaya (yenidən baxılmış) qoşulmaq barədə” qanun layihələri ilə bağlı məlumat vermişdir.
O bildirmişdir ki, hazırda Azərbaycan bayrağı altında xarici sularda 400-ə yaxın gəmi üzür. Bu sahədə yaranan müxtəlif səpkili çətinliklərin aradan qaldırılmasında sözügedən sənədlər mühüm rol oynayacaq, xilasetmə əməliyyatlarını və gəmiçiliyin asanlaşdırılmasını tənzimləyəcəkdir.
Deputatlar layihələrin Azərbaycanın milli maraqlarına cavab verdiyini nəzərə alaraq onları təsdiqləmişlər.
Sonra parlamentin hüquq siyasəti və dövlət quruculuğu məsələləri daimi komissiyasının sədri Əli Hüseynov “Beynəlxalq cinayətlərə görə məsuliyyət müəyyən edən qanunun qüvvəsinin geriyə şamil olunması haqqında” Konstitusiya Qanununu müzakirəyə təqdim etmişdir. O bildirmişdir ki, bu Qanun Azərbaycan Respublikasında sülh və insanlıq əleyhinə cinayətlərə və müharibə cinayətlərinə görə məsuliyyət nəzərdə tutan mövcud cinayət qanunvericiliyi normalarının tətbiqini “İnsan hüquqlarının və əsas azadlıqlarının müdafiəsi haqqında” Konvensiyanın və “Mülki və siyasi hüquqlar haqqında” Beynəlxalq Paktın müvafiq müddəalarına uyğunlaşdırmaq məqsədi ilə qəbul edilir. Müzakirələrdən sonra Qanun 103 səslə qəbul olunmuşdur.
Milli Məclisin axşam iclasında “Dövlət qulluğu haqqında”, “Dövlət rüsumu haqqında”, “Daşınmaz əmlakın dövlət reyestri haqqında” və “Ünvanlı dövlət sosial yardımı haqqında” Azərbaycan Respublikası Qanununun tətbiqi ilə əlaqədar “Yaşayış minimumu haqqında” qanunlara əlavələr və dəyişikliklər edilmişdir.
Sonra sosial siyasət daimi komissiyasının üzvü Məlahət Həsənova “Onkoloji yardım haqqında” qanun layihəsini ikinci oxunuşda müzakirəyə təqdim etmişdir. O bildirmişdir ki, birinci oxunuşdan sonra deputatların və mütəxəssislərin, eləcə də, əlaqədar təşkilatların təklifləri nəzərə alınmış, sənəd daha da təkmilləşdirilmişdir. Layihə ikinci oxunuşda qəbul edilmişdir. Sonra deputatlar “İnzibati ərazi vahidləri arasında ərazi məsələləri üzrə mübahisələrə baxılması üçün yaradılan xüsusi komissiyalar haqqında Əsasnamə”ni və “Azərbaycan Respublikasının ərazi vahidlərinin və inzibati ərazi dairələrinin dövlət reyestrinin aparılması və onlara şəhadətnamə verilməsi haqqında Əsasnaməni” təsdiqləmişlər.
Bölmənin digər xəbərləri
