Beynəlxalq seminarın növbəti bölməsi İnformasiya Texnologiyaları İnstitutunda təşkil olunub
Bakı, 10 aprel, AZƏRTAC
Bakıda keçirilən “Birləşmiş Nüvə Tədqiqatları İnstitutu (BNTİ) ilə Azərbaycan arasında nüvə fizikası, elementar zərrəciklər fizikası və zərrəcik detektorları sahəsində əməkdaşlığın üfüqləri” mövzusunda beynəlxalq seminar davam edir.
Azərbaycan Milli Elmlər Akademiyası (AMEA), BNTİ və Bakı Dövlət Universitetinin (BDU) birgə təşkilatçılığı ilə keçirilən seminarın növbəti bölməsi aprelin 10-da AMEA-nın İnformasiya Texnologiyaları İnstitutunda təşkil olunub.
İnstitutdan AZƏRTAC-a bildirilib ki, AMEA-nın Fizika-Riyaziyyat Texnika Elmləri Bölməsinin akademik-katibi, Fizika İnstitutunun direktoru, akademik Nazim Məmmədov tədbirin əhəmiyyətini qeyd edərək, onun elmə verəcəyi töhfələrdən danışıb. Seminarın ölkələrimiz arasında elm sahəsində əlaqələrin inkişaf etdirilməsində mühüm rol oynayacağını qeyd edib.
AMEA-nın akademik-katibi, İnformasiya Texnologiyaları İnstitutunun direktoru, akademik Rasim Əliquliyev institutda “Big Data” analitikası, bulud hesablamaları və digər istiqamətlərdə aparılan elmi tədqiqatlardan bəhs edib.
R.Əliquliyev rəhbərlik etdiyi qurumun Avropanın elm-təhsil infrastrukturuna inteqrasiyası istiqamətində görülən işlərdən bəhs edərək institutun “AzScienceNet” elm-kompüter şəbəkəsinin Avropanın elm və təhsil şəbəkəsi olan GEANT-a üzv olduğunu və milli operator funksiyasını yerinə yetirdiyini bildirib. Seminarın “Data Science” istiqamətinə həsr olunmasının əhəmiyyətindən danışan institut direktoru bu kimi seminarların keçirilməsinin mövcud problemlərin müzakirəsi baxımından zəruriliyini vurğulayıb.
BNTİ-nin direktor müavini, fizika-riyaziyyat elmləri doktoru, professor Mixail İtkis nüvə elminin beynəlxalq tədqiqat mərkəzi olan institutun nəzəri və eksperimental tədqiqatlarının əsas istiqamətləri haqqında məlumat verib. İnstitutun nüvə fizikası, elementar hissəcik fizikası və maddənin qatılaşdırılmış vəziyyətinin tədqiqi üzrə dünyanın bir çox ölkələrinin elmi mərkəz və universitetləri ilə əməkdaşlıq əlaqələri qurduğunu, “Böyük Adron Kollayderi” layihəsində iştirak etdiyini diqqətə çatdırıb.
Daha sonra BNTİ-nin informasiya texnologiyaları laboratoriyasının direktoru Vladimir Korenkov “Paylanmış hesablamalar və “Big Data” analitikasının inkişaf istiqamətləri. Beynəlxalq “Data Science” informasiya texnologiyaları məktəbi” mövzusunda məruzə ilə çıxış edib. Məruzəçi informasiya texnologiyaları sahəsində baş verən ən son yeniliklərə dair aparılan araşdırmalardan söz açaraq grid, bulud, superkompüter və “Big Data” texnologiyaları sahəsində mühüm nailiyyətlərin əldə olunduğunu diqqətə çatdırıb. O, Avropa Nüvə Tədqiqatları Mərkəzində (CERN) məlumatların toplanması və arxivləşdirilməsi üsulları, “Big Data” analitikası, rəhbərlik etdiyi laboratoriyanın fəaliyyət istiqamətləri və informasiya texnologiyaları infrastrukturu və s. haqqında ətraflı məlumat verib.
V.Korenkov beynəlxalq “Data Science” informasiya texnologiyaları məktəbinin iş prinsipi, burada həyata keçirilən layihələrdən danışaraq məktəbin əsas məqsədinin “Big Data” analitikasının köməyi ilə nəzəri və praktiki problemləri həll edə bilən “Data Science” üzrə yüksəkixtisaslı mütəxəssislərin hazırlanması olduğunu bildirib.
Məruzəçi bu məktəbdə treninqlər keçən təşkilatların tələbələrinin informasiya texnologiyaları istiqaməti üzrə perspektivlərindən, BNTİ-nin informasiya texnologiyaları laboratoriyasının Azərbaycanın elmi mərkəzləri və universitetləri ilə əməkdaşlıq əlaqələrinin inkişafından danışıb.
Məruzə ətrafında geniş fikir mübadiləsi aparılıb, suallar cavablandırılıb, təkliflər səsləndirilib.
Sonra akademiklər Rasim Əliquliyev, Nazim Məmmədov, dosent Rəşid Ələkbərov və İnformasiya Texnologiyaları İnstitutunun, ADA Universitetinin, BDU-nun və BNTİ-nin nümayəndələrinin iştirakı ilə görüş keçirilib.
Görüşdə BNTİ ilə əməkdaşlıq əlaqələrinin inkişafı, kadr və təcrübə mübadiləsinin aparılması və birgə layihələrin həyata keçirilməsi istiqamətində müzakirələr aparılıb.
Görüşdə “Big Data” analitikasına dair birgə layihələrin həyata keçirilməsi, bu layihələrin “AzScienceNet”in inkişafına yaratdığı imkanlar müzakirə olunub. BNTİ-nin nümayəndələri akademiya əməkdaşlarının bu elmi qurumda təcrübə keçmələri üçün dəstək verməyə hazır olduqlarını bildiriblər.
Qeyd edək ki, seminarın sonuncu bölməsi aprelin 11-də Fizika İnstitutunda keçiriləcək.
Bölmənin digər xəbərləri
