BEYNƏLXALQ TƏBİB TƏLƏBƏLƏR ASSOSİASİYALARI FEDERASİYASININ NÖVBƏTİ YIĞINCAĞINDA AZƏRBAYCANLI TƏLƏBƏLƏR İŞTİRAK ETMİŞLƏR
Yamaykada Beynəlxalq Təbib Tələbələr Assosiasiyaları Federasiyasının (İFMSA) növbəti yığıncağı keçirilmişdir. Tədbirdə dünyanın 95 ölkəsindən tibb sahəsində təhsil alan tələbələr iştirak etmişlər.
Gənclər və İdman Nazirliyinin mətbuat xidmətindən AZƏRTAC-a bildirmişlər ki, Azərbaycanın “Həkimlər və Təbib Tələbələr Cəmiyyəti” İctimai Birliyinin üzvləri yığıncaqda ölkəmizi təmsil etmişlər.
Tədbirdə elmi ixtisas mübadilələri üzrə 30 müqavilə imzalanmışdır. Müqavilələrə əsasən, üç pilləli seçimdən keçəcək tələbələrimizə Avropanın inkişaf etmiş ölkələrində bir ay təcrübə keçmək imkanı verilmişdir.
Yığıncaq çərçivəsində “Həkimlər və Təbib Tələbələr Cəmiyyəti” İctimai Birliyinin həyata keçirəcəyi “Tibb təhsilində Bolonya prosesi və müasir tədris metodları” layihəsinin təqdimatı keçirilmiş, ölkəmizi tanıtmaq məqsədi ilə tədbir iştirakçılarına müxtəlif çap məhsulları təqdim olunmuşdur.
Azərbaycan 2005-ci ildən İFMSA-nın üzvüdür. Bu təşkilatda ölkəmizin üzvlüyünü şərtləndirən əsas amil tibb sahəsində təhsil alan tələbələrin bu təşkilat tərəfindən təklif edilən mübadilə proqramlarında iştirakını təmin etmək və Avropa təhsil məkanına inteqrasiya istiqamətində islahatlara töhfə verməkdir.
1951-ci ildə yaradılmış İFMSA dünyanın 95 ölkəsinin 102 tibb tələbə təşkilatını birləşdirir.
Bölmənin digər xəbərləri
