BEYNƏLXALQ VALYUTA FONDU SON İLLƏR AZƏRBAYCANDA APARILAN İQTİSADİ VƏ STRUKTUR İSLAHATLARININ NƏTİCƏLƏRİNDƏN RAZIDIR
Dövlət Gömrük Komitəsinin mətbuat xidmətindən AZƏRTAC-a bildirmişlər ki, Azərbaycan Respublikası ilə Beynəlxalq Valyuta Fondu arasında yaranan əlaqələrin durmadan inkişaf etdiyini söyləyən missiyanın rəhbəri, son illər ölkəmizdə həyata keçirilən iqtisadi və struktur islahatlarından razılığını bildirmişdir. Sonra o, 2003-cü ilin büdcəsinin icrası, 2004-cü ildə Dövlət Gömrük Komitəsi üçün nəzərdə tutulan büdcə proqnozu, gömrük sisteminin islahat proqramına dair Tədbirlər Planının cədvələ uyğun yerinə yetirilməsi vəziyyəti ilə “Azərbaycan Respublikası ərazisinə gətirilən və əlavə dəyər vergisindən azad olunan malların siyahısı haqqında” 2000-ci il 13 iyul tarixli 124 saylı qərara ediləcək dəyişikliklərlə bağlı görülən işlərlə maraqlanmışdır.
Müzakirə edilən məsələlərə münasibətini bildirən DGK sədri Kəmaləddin Heydərov 2003-cü ilin “Dövlət büdcəsi haqqında” Qanuna əsasən, Dövlət Gömrük Komitəsi üçün nəzərdə tutulmuş proqnozun yerinə yetirilməsi istiqamətində görülən işlər haqqında ətraflı məlumat vermişdir. Onun sözlərinə görə, cari ilin 9 ayında nəzərdə tutulmuş proqnoza 102,8 faiz əməl edilmiş, yanvar-sentyabr ayları ərzində 724,2 milyard manat əvəzinə 744,9 milyard manat gömrük vergi və rüsumları toplanaraq dövlət büdcəsinə köçürülmüşdür. Bu isə ötən ilin müvafiq dövrü ilə müqayisədə 91,5 milyard manat və ya 14,0 faiz artıq deməkdir. Vergi növləri üzrə rəqəmlərə diqqəti yönəldən K.Heydərov ilkin məlumata görə, bu ilin oktyabr ayı üçün də nəzərdə tutulan proqnoza artıqlaması ilə əməl edildiyini, dövlət büdcəsinə 74,5 milyard manat əvəzinə 85,2 milyard manat gömrük vergi və rüsumlarının köçürüldüyünü xatırlatmışdır.
2003-cü ilin 9 ayı ərzində idxal olunan mallar üzrə azadolmaların ötən ilin müvafiq dövrü ilə müqayisədə artdığını diqqətə çatdıran K.Heydərov, ilin sonunadək DGK üçün nəzərdə tutulmuş proqnozun yerinə yetirilməsi istiqamətində atılacaq addımlardan da bəhs etmişdir.
Gələn ilin büdcəsi ilə bağlı fikrini açıqlayarkən komitə sədri bildirmişdir ki, Milli Məclisə müzakirələr üçün təqdim olunan 2004-cü ilin büdcə layihəsində büdcə daxilolmalarında Dövlət Gömrük Komitəsi üçün 1 trilyon 120 milyard manat vergi və rüsumların toplanılması proqnozlaşdırılmışdır.
Komitə sədri gömrük sisteminin islahat proqramı ilə əlaqədar görülən işlər barəsində məlumat verərkən qonağın nəzərinə onu da çatdırmışdır ki, tədbirlər planının cədvəlinə uyğun olaraq 4 mal qrupu üzrə tətbiq olunan spesifik rüsumlar Nazirlər Kabinetinin müvafiq qərarı ilə 15 faiz dərəcəsi ilə advalor rüsumlarla əvəz olunmuş və qərar oktyabrın 1-dən qüvvəyə minmişdir.
“Azərbaycan Respublikası ərazisinə gətirilən və əlavə dəyər vergisindən azad olunan malların siyahısı haqqında” 2000-ci il 13 iyul tarixli 124 saylı qərara ediləcək dəyişikliklərlə bağlı fikrini açıqlayan Kəmaləddin Heydərov yeni qərar layihəsinin sentyabrın 24-də Nazirlər Kabinetinə təqdim olunduğunu söyləmişdir. Onun sözlərinə görə, əlavə dəyər vergisinə cəlb olunası malların hökumətə təqdim edilən siyahısı müvafiq qərarla təsdiqlənərsə, bir ildə təqribən 60-65 milyard manat əlavə vergi toplanacağı mümkün hesab edilir.
Verilən ətraflı məlumata görə, komitə sədrinə minnətdarlığını bildirən Con Uikman Linn, gömrük orqanları tərəfindən bundan sonra da qarşıda duran vəzifələrin layiqincə həyata keçiriləcəyinə əminliyini ifadə etmişdir.
Görüşdə bir sıra digər məsələlər ətrafında da müzakirələr aparılmışdır.
Bölmənin digər xəbərləri
