Bişkekdən verilən strateji mesajlar Azərbaycanın geosiyasi reallıqdakı rolunu bir daha təsdiqlədi ŞƏRH
Bakı, 1 avqust, AZƏRTAC
Azərbaycan Respublikasının Prezidenti İlham Əliyevin Qırğız Respublikasına dövlət səfəri və səfər çərçivəsində mətbuat bəyanatı təkcə iki dost və qardaş ölkə arasında münasibətlərin inkişafına dair fikir mübadiləsi deyil, həmçinin Cənubi Qafqaz, Mərkəzi Asiya və bütövlükdə Türk dünyasının gələcək əməkdaşlıq gündəmini müəyyənləşdirən mühüm siyasi mesajlar kimi qiymətləndirilməlidir. Bəyanatda səsləndirilən fikirlər Azərbaycanın son illərdə həyata keçirdiyi xarici siyasətin ardıcıllığını, çoxtərəfli əməkdaşlıq modelinə sadiqliyini və regional sabitliyin təmin olunmasına verdiyi töhfəni bir daha nümayiş etdirdi.
Bu fikirləri AZƏRTAC-a açıqlamasında Milli Məclisin deputatı Jalə Əliyeva deyib. Deputat vurğulayıb ki, bu gün Azərbaycan yalnız Cənubi Qafqazın deyil, Avrasiya məkanının mühüm siyasi, iqtisadi və nəqliyyat mərkəzlərindən birinə çevrilib. Prezident İlham Əliyevin rəhbərliyi ilə həyata keçirilən məqsədyönlü siyasət nəticəsində ölkəmiz beynəlxalq təşkilatlarda nüfuzunu artırıb. Ölkəmiz enerji təhlükəsizliyi, nəqliyyat-kommunikasiya layihələri və regional əməkdaşlıq sahələrində etibarlı tərəfdaş kimi qəbul olunur. Qırğızıstana dövlət səfəri zamanı səsləndirilən fikirlər də məhz bu strateji xəttin davamı idi.
“Prezident İlham Əliyev çıxışında Azərbaycan ilə Qırğızıstan arasında münasibətlərin müttəfiqlik səviyyəsinə yüksəldiyini, siyasi dialoqun, iqtisadi əlaqələrin, investisiya layihələrinin və humanitar əməkdaşlığın dinamik inkişaf etdiyini xüsusi vurğulayıb. Bu yanaşma göstərir ki, Azərbaycan Türk Dövlətləri Təşkilatı çərçivəsində inteqrasiyanın dərinləşdirilməsini prioritet istiqamətlərdən biri hesab edir. Son illər Türk dünyasında müşahidə olunan həmrəylik məhz Azərbaycan Prezidentinin təşəbbüsləri və fəal diplomatiyası ilə yeni məzmun qazanıb.
Mətbuata bəyanatda nəqliyyat dəhlizləri, Orta Dəhlizin inkişafı, ticarət dövriyyəsinin artırılması, qarşılıqlı investisiyalar və Qarabağın bərpasında əməkdaşlıq məsələlərinin ön plana çəkilməsi Azərbaycanın gələcəyə hesablanmış strateji baxışını nümayiş etdirib. Bu, təkcə ikitərəfli münasibətlər deyil, bütövlükdə regionun iqtisadi inteqrasiyasına xidmət edən mühüm istiqamətlərdir”, - deyə Jalə Əliyeva qeyd edib.
Müsahibimiz bildirib ki, diqqətçəkən məqamlardan biri də Azərbaycanın beynəlxalq aləmdə artan nüfuzunun artıq müxtəlif dövlətlərin konkret əməkdaşlıq təşəbbüslərində öz əksini tapmasıdır. Son illərdə dünyanın aparıcı siyasi liderlərinin Azərbaycana səfərləri, ölkəmizdə keçirilən beynəlxalq tədbirlər, xarici nümayəndə heyətlərinin Qarabağa səfərləri və yeni əməkdaşlıq layihələri Azərbaycanın beynəlxalq etimad kapitalının əhəmiyyətli dərəcədə yüksəldiyini göstərir.
Azərbaycanın beynəlxalq mövqeyinin möhkəmlənməsi, Türk dünyasında inteqrasiya proseslərinin sürətlənməsi, nəqliyyat və enerji layihələrinin genişlənməsi konkret faktlarla təsdiq olunan reallıqlardır. Bu uğurlar müxtəlif beynəlxalq tərəfdaşların ölkəmizə münasibətində, imzalanan sənədlərdə və həyata keçirilən layihələrdə öz ifadəsini tapır.
“Prezident İlham Əliyevin Qırğızıstana dövlət səfəri və Bişkekdə mətbuata bəyanatı bir daha nümayiş etdirdi ki, Azərbaycan regional siyasətin istiqamətlərini müəyyənləşdirən, təşəbbüslər irəli sürən və onların həyata keçirilməsində fəal rol oynayan dövlətdir. Bu siyasətin mərkəzində isə milli maraqların qorunması, Türk dünyasının birliyinin möhkəmləndirilməsi, iqtisadi əməkdaşlığın genişləndirilməsi və regionda uzunmüddətli sabitliyin təmin edilməsi dayanır.
Mövcud geosiyasi şəraitdə Azərbaycanın ardıcıl və praqmatik xarici siyasəti ölkəmizin beynəlxalq nüfuzunu daha da artırır. Qırğızıstana dövlət səfəri zamanı verilən mesajlar da göstərdi ki, Azərbaycan yalnız bugünkü deyil, gələcək onilliklərin regional inkişaf modelinin formalaşmasında da mühüm söz sahibidir”, - deyə deputat fikrini yekunlaşdırıb.
Bölmənin digər xəbərləri
