BMT BƏNƏZİR BHUTTONUN QƏTLİNİ TƏHQİQ EDƏCƏK KOMİSSİYA YARADACAQDIR
AZƏRTAC xəbər verir ki, BMT Pakistanın xahişi ilə müxalifətin lideri Bənəzir Bhuttonun qətlini araşdıracaq xüsusi müstəqil komissiya yaradacaqdır. Bunu Pakistanın xarici işlər naziri Şah Mahmud Kureşi BMT-nin Baş katibi Pan Gi Mun ilə görüşündən sonra bildirmişdir.
Pakistanın sabiq Baş naziri, sonralar isə müxalif Pakistan Xalq Partiyasının lideri Bənəzir Bhutto ötən il Böyük Britaniyadan Vətənə dönəndən bir neçə gün sonra, dekabrın 27-də qətlə yetirilmişdi. Çoxminlik mitinq zamanı intiharçı-terrorçu Bhuttonun avtomobilini atəşə tutmuş, sonra isə özünü avtomaşının yaxınlığında partlatmışdır.
Pakistanın xarici işlər naziri demişdir: “Komissiyanın məqsədi qətlin təşkilatçılarını, icraçılarını və sifarişçilərini üzə çıxarıb, ədalət məhkəməsinə verməkdir. Pan Gi Mun demişdir ki, komissiyanın formatını və strukturunu müəyyən etmək üçün Pakistan hökuməti və BMT-nin digər üzvləri ilə əlavə məsləhətləşmələr aparmalıdır”. Kureşi vurğulamışdır ki, komissiyanın bütün məlumat mənbələri ilə maneəsiz tanış olması üçün şərait yaradılması barədə BMT Baş katibi ilə tam razılıq əldə edilmişdir.
Bölmənin digər xəbərləri
