BMT-NİN BAŞ KATİBİ GUAM ƏRAZİSİNDƏ DONDURULMUŞ MÜNAQİŞƏLƏRLƏ BAĞLI QƏTNAMƏYƏ DAİR MƏRUZƏ HAZIRLAYIR
AZƏRTAC xəbər verir ki, GUAM ərazisində dondurulmuş münaqişələrlə bağlı BMT Baş Məclisinə təqdim edilən qətnamə layihəsinin qəbulu ilə bağlı maraqlı tərəflərlə məsləhətləşmələr aparılır. Qurumun baş katibi qətnamə üzrə məruzə hazırlayacaqdır.
Azərbaycan Respublikasının BMT yanında daimi nümayəndəsi Aqşin Mehdiyev bildirmişdir ki, GUAM ölkələri Dağlıq Qarabağla əlaqədar BMT Baş Məclisinə daha bir sənəd təqdim etmişlər. “GUAM ölkələri ərazilərində dondurulmuş münaqişələrin beynəlxalq sülhə, təhlükəsizliyə və inkişafa təsiri” adlı qətnamə layihəsi müzakirə olunmaq üçün təşkilatın gündəliyinə salınmışdır. BMT Baş Məclisinə təqdim edilən qətnamədə GUAM ölkələrinin ərazi bütövlüyü məsələsi xüsusi vurğulanır.
Qeyd edək ki, GUAM-ın Parlament Assambleyasının 2005-ci ilin sentyabrında keçirilmiş toplantısında bu münaqişələrin ədalətli həllində GUAM-ın rolunun artırılması əsas müzakirə mövzusu olmuşdur. 2006-cı ilin sentyabrında “GUAM ərazisində həlli uzanmış münaqişələr, onların beynəlxalq aləm, təhlükəsizlik və inkişafa təsiri” məsələsi təşkilatın səyi nəticəsində BMT Baş Məclisinin 61-ci sessiyasının gündəliyinə salınmışdır. Ötən ilin sentyabrında isə BMT-nin Baş Məclisində “GUAM ölkələri ərazilərində dondurulmuş münaqişələrin beynəlxalq sülhə, təhlükəsizliyə və inkişafa təsiri” adlı bənd gündəliyə salınmış və qəbul edilmişdir.
Bölmənin digər xəbərləri
