BMU-da ilk dəfə proqram təminatı mühəndisliyi ixtisası üzrə qəbul aparılır
Bakı, 3 avqust, AZƏRTAC
Bakı Mühəndislik Universitetində (BMU) 2026-2027-ci tədris ilindən etibarən bakalavriat səviyyəsində ilk dəfə proqram təminatı mühəndisliyi ixtisası üzrə tələbə qəbulu həyata keçirilir.
Universitetdən AZƏRTAC-a bildirilib ki, müasir əmək bazarının tələbləri nəzərə alınmaqla yaradılan yeni ixtisas ölkədə proqram təminatı mühəndisliyi sahəsində yüksəkixtisaslı kadr hazırlığının gücləndirilməsinə xidmət edəcək. Rəqəmsal iqtisadiyyatın sürətli inkişafı, süni intellekt texnologiyalarının geniş tətbiqi, proqram təminatına əsaslanan xidmətlərin artması və sənayenin rəqəmsal transformasiyası proqram mühəndislərinə tələbatı əhəmiyyətli dərəcədə artırıb. Bu gün proqram təminatı mühəndisləri informasiya texnologiyaları ilə yanaşı, bank və maliyyə, telekommunikasiya, sənaye, səhiyyə, təhsil, logistika, elektron ticarət və dövlət idarəçiliyi kimi müxtəlif sahələrdə fəaliyyət göstərirlər.
Qeyd olunub ki, ixtisas üzrə təhsil alan tələbələr universitetin müasir kompüter və kibertəhlükəsizlik laboratoriyalarında praktiki bilik və bacarıqlar əldə edəcəklər. Laboratoriyalarda proqram təminatının hazırlanması və testləşdirilməsi, şəbəkələrin idarə olunması, kibertəhlükəsizlik ssenarilərinin modelləşdirilməsi, həmçinin süni intellekt tətbiqlərinin hazırlanması istiqamətində praktiki məşğələlər keçiriləcək.
Tədris proqramı çərçivəsində tələbələr proqramlaşdırma dilləri, proqram mühəndisliyinin əsasları, obyektyönlü proqramlaşdırma, alqoritmlər və verilənlər strukturları, verilənlər bazaları, əməliyyat sistemləri, kompüter şəbəkələri, veb-texnologiyaları, proqram təminatının layihələndirilməsi və arxitekturası, DevOps metodologiyaları, proqram təminatının testləşdirilməsi, təhlükəsiz proqramlaşdırma, mobil tətbiqlərin hazırlanması, istifadəçi interfeyslərinin layihələndirilməsi və proqram layihələrinin idarə olunması üzrə biliklərə yiyələnəcəklər.
Bundan əlavə, tələbələr süni intellekt, maşın öyrənməsi, bulud hesablama platformaları (AWS, Microsoft Azure və Google Cloud), proqram sistemlərinin modelləşdirilməsi və müasir proqram təminatının hazırlanması alətləri üzrə də hazırlıq keçəcəklər. Tədris prosesində proqram təminatının təhlükəsizliyi, performansın optimallaşdırılması, sistem arxitekturasının qurulması və beynəlxalq standartlara uyğun proqram məhsullarının hazırlanmasına xüsusi diqqət yetiriləcək.
Təhsil proqramı yalnız texniki biliklərin deyil, həm də analitik düşüncə, mürəkkəb problemlərin həlli, komanda işi, layihələrin idarə olunması, texniki sənədləşmə, peşəkar kommunikasiya və innovativ yanaşma kimi müasir mühəndis üçün vacib kompetensiyaların formalaşdırılmasını hədəfləyir.
BMU-da ilk dəfə tədris olunacaq proqram təminatı mühəndisliyi ixtisası ölkənin rəqəmsal inkişaf strategiyasına uyğun olaraq proqram təminatı sahəsində beynəlxalq rəqabətədavamlı, innovativ düşüncəyə malik və müasir texnologiyaları dərindən mənimsəmiş mühəndislərin hazırlanmasına mühüm töhfə verəcək. Yeni ixtisas həm Azərbaycanın, həm də qlobal əmək bazarının tələblərinə cavab verən, gələcəyin peşələrindən birinə yiyələnmək istəyən gənclər üçün geniş imkanlar açacaq. Yeni ixtisas üzrə təhsil alan tələbələr yalnız proqramlaşdırma bacarıqları deyil, həm də süni intellekt, bulud texnologiyaları, proqram arxitekturası və rəqəmsal innovasiyalar sahəsində müasir kompetensiyalar qazanaraq ölkənin və beynəlxalq əmək bazarının tələblərinə cavab verən yüksəkixtisaslı proqram mühəndisləri kimi formalaşacaqlar.
Bölmənin digər xəbərləri
