BOKS ÜZRƏ DÜNYA ÇEMPİONU AĞASI MƏMMƏDOVUN ÇIXIŞI
Hörmətli mərasim iştirakçıları!
Bu gün mənim sevincimin həddi-hüdudu yoxdur. Həyatımda ilk dəfə olaraq, dünyanın ən böyük idman bayramı olan Olimpiya oyunlarının iştirakçısı kimi hörmətli Prezidentimizin hüzurunda, dövlətimizin üçrəngli bayrağı qarşısında and içməyə gəlmişəm. Bundan böyük xoşbəxtlik olarmı? Mən başa düşürəm, sevincimiz nə qədərdirsə, məsuliyyətimiz də bir o qədər böyükdür. Mənim və komanda yoldaşlarımın qarşısında böyük sınaq durur. Çünki biz ölkəmizin Olimpiya oyunlarında təmsil olunacağı idman növləri arasında ən böyük tərkibdə lisenziyalar qazanmışıq.
Boksçular həmişə dövlət tərəfindən qayğı və diqqət hiss edirlər. Olimpiya oyunları ərəfəsində idmançılarımız bir sıra mötəbər rəsmi yarışlarda iştirak edərək, yüksək nəticələrə nail olmuş, Azərbaycanın üçrəngli bayrağını bir çox ölkələrdə yüksəklərə qaldırmışlar. Mən xoşbəxtəm ki, boks tarixində ötən il ilk dəfə olaraq, dünya çempionu adına layiq görülmüşəm.
Olimpiadaya hazırlıq gərgin təlim-məşq toplanışlarının mütəmadi keçirilməsi ilə səciyyələnmişdir. Belə ki, ən müasir idman qurğularında, Azərbaycanın gözəl, səfalı yerlərində təlim-məşq toplanışları keçirilmiş və biz idmançılar üçün hərtərəfli şərait yaradılmışdır.
Boks Azərbaycanda ən populyar və inkişaf etmiş idman növlərindən biridir. Azərbaycan idmançıları son illər beynəlxalq miqyaslı yarışlarda yaxşı nəticələr göstərir, idman aləmində özünəməxsus mövqeyə malikdirlər. Qısa müddət ərzində Azərbaycan Boks Federasiyası Milli Olimpiya Komitəsinin, Gənclər, İdman və Turizm Nazirliyinin köməyi ilə müxtəlif səviyyəli beynəlxalq yarışların Bakı şəhərində keçirilməsinə nail olmuşdur. Beynəlxalq Boks Federasiyasının rəhbərliyi boks idman növünün ölkəmizdə bu cür inkişafına görə respublika federasiyasına öz təşəkkürünü bildirmişdir. Əlbəttə, bütün bu uğurlar və nailiyyətlər ulu öndərimiz, ümummilli liderimiz Heydər Əliyevin idmanımıza göstərdiyi qayğı və diqqətin, idmançılarımızın yarışlarda iştirakının təmin edilməsi sayəsində mümkün olmuşdur.
Qarşılaşdığımız problemlər vaxtında həll edilmiş, hazırlığın gedişinə mənfi təsir göstərə bilməmişdir. Artıq demək olar ki, komandamızın bütün üzvləri Olimpiya startlarına hazırdırlar.
Biz idmançılarımıza göstərilmiş bütün diqqət və qayğıya görə Milli Olimpiya Komitəsinə, Gənclər, İdman və Turizm Nazirliyinə, federasiyalara və idman təşkilatlarına öz dərin minnətdarlığımızı bildiririk.
Mərasim ərəfəsində mən digər idman növləri üzrə baş məşqçilərlə, idman mütəxəssisləri ilə hazırlıq haqqında söhbət etmişəm. Bütün məşqçilər hər bir şəraitin yüksək səviyyədə yaradıldığını bildirmişlər. Azərbaycan olimpiyaçıları istər səviyyəcə, istərsə də keyfiyyətcə güclü komanda təşkil edir və bu amil Azərbaycan idmançılarının ən yüksək uğurlara nail olacağından xəbər verir.
Sonda mən istərdim ki, belə əlamətdar tədbirlərin və ənənələrin davam etdirilməsini təmin edən dövlətimizin başçısı, Milli Olimpiya Komitəsinin rəhbəri hörmətli Prezidentimiz cənab İlham Əliyevə respublikamızın bütün idman ictimaiyyəti adından dərin minnətdarlığımızı və təşəkkürümüzü bildirim.
X X X
Azərbaycan Prezidenti İlham Əliyev mərasimdə nitq söylədi.
(Dövlətimizin başçısının nitqi qəzetin bugünkü nömrəsinin birinci səhifəsində dərc olunur).
X X X
Sidney Olimpiadasının sərbəst güləş üzrə qalibi, ölkəmizin Olimpiya komandasının kapitanı Namiq Abdullayev idmançılarımızın Olimpiya andının mətnini oxudu.
Bölmənin digər xəbərləri
