BÖLGƏLƏRDƏ AZƏRBAYCAN QADINLARININ III QURULTAYINA HAZIRLIQLA BAĞLI KONFRANSLAR KEÇİRİLİR
AZƏRTAC xəbər verir ki, Azərbaycan qadınlarının III qurultayına hazırlıqla bağlı Şəmkir və Ağstafada qadınların növbəti konfransları keçirilmişdir.
Şəmkirdə keçirilən tədbirdə çıxış edən Ailə, Qadın və Uşaq Problemləri üzrə Dövlət Komitəsinin şöbə müdiri Yeganə Musazadə, rayon Qadınlar Şurasının sədri Nəzixə Zeynalova, Bakı Slavyan Universitetinin prorektoru Sahibə Qafarova, Milli Məclisin deputatı Məlahət Həsənova və başqaları qadın problemlərinə toxunmuşlar. Bildirilmişdir ki, rayonun 187 min əhalisinin 50 faizindən çoxunu qadınlar təşkil edir.
Müzakirələrdə həmçinin ailədaxili münasibətlər, o cümlədən qadınlara qarşı zorakılıq hallarının aradan qaldırılması barədə də söhbət getmişdir.
Konfransda Azərbaycan qadınlarının III qurultayına nümayəndələr, rayon Qadınlar Şurasının idarə heyəti və Ağbirçəklər Şurasının üzvləri seçilmişdir.
Ağstafada keçirilən konfransda çıxış edənlər ölkədə həyata keçirilən dövlət qadın siyasətinin uğurlu nəticələrindən danışaraq vurğulamışlar ki, rayonda səhiyyə sahəsində çalışanların 70 faizi qadınlardır, 39 məktəbdən 17-nə qadınlar rəhbərlik edirlər.
Sonda qadınların qarşıdakı qurultayına nümayəndələr seçilmişdir.
Bölmənin digər xəbərləri
