BRİTANİYALILARIN YARIDAN ÇOXU İRQÇİLİKDƏN NARAZIDIR
Britaniyalıların 51 faizi hesab edir ki, onlar irqi ayrı-seçkilik cəmiyyətində yaşayırlar. Ölkənin ağdərili sakinlərinin 52 faizi və qaradərili sakinlərinin 53 faizi, habelə Asiya mənşəli britaniyalıların 41 faizi məhz bu fikirdədir. Bunu Bi-Bi-Si-nin sifarişi ilə keçirilmiş ictimai rəy sorğusunun nəticələri sübut edir.
İTAR-TASS-ın verdiyi xəbərə görə, sorğuda iştirak edənlərin 44 faizi güman edir ki, son 50 il ərzində mühacirət Britaniyaya ziyan vurmuşdur. Sorğuda iştirak edən ağdərili vətəndaşların 47 faizi bu fikirlə razıdır. 27 faizinin fikrincə isə, əksinə, Britaniya mühacirətdən udmuşdur.
Respondentlərin əksəriyyəti belə hesab edir ki, Britaniya cəmiyyətində digər irqin nümayəndələrinə münasibət on il bundan əvvəlkindən daha dözümlüdür. 78 faiz isə əmindir ki, Britaniyada yaşamaq istəyənlər üçün ingilis dili dərsi keçilməlidir.
Sorğunun nəticələri sübut edir ki, iş yerində irqi ayrı-seçkilik ciddi problemə çevrilmişdir. Britaniyanın Afrika və yaxud Asiya mənşəli hər üç sakinindən biri iddia edir ki, irqi ayrı-seçkiliyə görə istədiyi işə düzələ bilməmişdir. Qaradərililərin 40 faizi və Asiya mənşəli britaniyalıların 34 faizi iş yerində irqi ayrı-seçkilik təzahürləri ilə rastlaşdığını söyləyir.
Tədqiqatlar göstərir ki, britaniyalıların çoxu üçün irqçilik məsələsi şəxsi münasibətlərdə maneə deyildir. Respondentlərin yarısı bildirmişdir ki, digər irqdən olan şəxslərlə intim əlaqədə olar və yaxud ailə qurardı. Sorğu iştirakçılarının çoxu bu fikirdədir ki, əgər uşaqları digər irqdən olan şəxslərlə evlənmək istəsələr, etiraz etməyəcəklər.
Bölmənin digər xəbərləri
