“BU, TARİXDƏ ƏN YAXŞI OLİMPİADA OLACAQ…”
Biz idman ənənələri ilə tanınan Azərbaycanın nümayəndələrinə Pekində uğurlu start və əvvəlki olimpiadalarda qazandıqları nailiyyətləri mütləq yaxşılaşdırmağı arzulayırıq. Bunu AZƏRTAC-ın xüsusi müxbirinə Çin Xarici İşlər Nazirliyinin informasiya departamentinin rəisi Sin Qan bildirmişdir. XXIX Olimpiya oyunları ərəfəsində Pekinə və ÇXR-in digər şəhərlərinə səfər etmiş bir qrup MDB jurnalisti ilə söhbətində XİN-in yüksək vəzifəli məmuru son bir neçə ildə ölkədə həyata keçirilən genişmiqyaslı hazırlıq işlərindən, əhalinin bi idman bayramının iştirakçılarını və qonaqlarını necə böyük ruh yüksəkliyi ilə gözləməsindən söhbət açmışdır. Təşkilatçılar Pekin Olimpiadasının tarixdə ən yaxşı olimpiada olacağına ümid bəsləyirlər.
Sin Qan demişdir ki, planetin ən mühüm idman yarışlarına hazırlıq zamanı biz genişmiqyaslı beynəlxalq, habelə Çin ilə ənənəvi dostluq və əməkdaşlıq ənənələri olan MDB ölkələrindən dəstək almışıq. Birliyin bir çox ölkələri çoxsaylı nümayəndə heyətləri ilə təmsil olunacaq, bu ölkələrin bəzi yüksək vəzifəli şəxsləri aparıcı dövlətlərin siyasi və dövlət liderləri ilə yanaşı, Olimpiadaya gəlmək niyyətindədirlər.
Çin hökuməti, habelə XXIX Olimpiya oyunlarının təşkilat komitəsi bu parlaq gənclik və idman festivalının uğurla keçməsi və hamının ürəyincə olması üçün çox böyük işlər görmüşlər. İdman obyektlərinin təxminən üçdə ikisi məxsusi olaraq Olimpiya oyunları üçün bir neçə ilə tikilmişdir. Onların inşasında çinli ustalarla yanaşı, aparıcı əcnəbi mütəxəssislər də iştirak etmiş, ən müasir texnologiyalardan və materiallardan geniş istifadə olunmuşdur. Buna görə də beynəlxalq ekspertlər həmin obyektlərin əksəriyyətini nadir tikililər sırasına aid etmişlər.
Pekinin nəqliyyat infrastrukturu beynəlxalq standartlar nəzərə alınmaqla əsaslı şəkildə modernləşdirilmişdir. Olimpiada günlərində şəhərdəki 300 avtobus marşrutu 20 milyon sərnişin daşıyacaqdır. Paytaxt metropolitenində yeni dairəvi xətt təzəcə istifadəyə verilmişdir. Şəhərin ekologiyasının yaxşılaşdırılması və yaşıllaşdırma istiqamətində çox işlər görülmüş, bir sıra zərərli istehsalat obyektləri bağlanmış, nəqliyyatın, xüsusən işlənmiş qazlarla atmosferi çirkləndirən köhnə markalı avtomaşınların hərəkəti xeyli məhdudlaşdırılmışdır.
Olimpiya ehtirasları səngiyəndən sonra bütün stadionlar, idman sarayları və mərkəzləri son vaxtlar beynəlxalq aləmdə özlərini getdikcə daha çox tanıdan Çin idmançılarının sərəncamına veriləcəkdir.
Cənab Sin Qandan Olimpiadanın ev sahiblərinin neçə medal qazanmaq niyyətində olduğunu soruşduq. O, diplomatik bir tərzdə bu suala cavab verməkdən vaz keçsə də, dedi ki, ölkədə Olimpiya komplekslərinin inşası ilə yanaşı, ən sadə idman meydançalarının tikintisi də genişlənmişdir. Bu, son illərdə Çində yaşanan əsl idman bumuna sübutdur. “Bədən tərbiyəsi kütləvi xarakter almalı, idmanda ustalıq göstərməliyik” devizi onu göstərir ki, arzu edən hər kəs öz sağlamlığını möhkəmlətmək istəyən çoxmilyonlu həmvətənləri arasında yer tapa bilər. Buna görə də təsadüfi deyildir ki, Olimpiadanın təşkilatçılarının, qonaqların və iştirakçıların könüllü köməkçiləri olmaq istəyənlər ölkənin bütün guşələrindən paytaxta üz tuturlar. Lakin yüz minlərlə bu cür könüllülər arasında çox ciddi seçim aparılır.
Sin Qan dedi: Biz istəyirik ki, Pekin Olimpiadasına gələnlərin hamısı Çinin qazandığı uğurları, onun yeritdiyi açıqlıq siyasətinin və iqtisadi islahatların 30 illik bəhrəsini öz gözləri ilə görsünlər, insanla təbiətin həqiqi harmoniyasını hiss etsinlər, xalqımızın qədim və bənzərsiz mədəniyyəti ilə yaxından tanış olsunlar. Əminəm ki Pekin Olimpiadasından sonra planetimizdə Çinin dostlarının sayı qat-qat artacaqdır.
######
 |
 |
Bölmənin digər xəbərləri
