BVF-NİN NÜMAYƏNDƏ HEYƏTİ AZƏRBAYCANA SƏFƏRİNİN YEKUNLARINDAN RAZIDIR
Beynəlxalq Valyuta Fondunun ikinci Avropa Departamentinin direktoru Con Odlinq-Sminin başçılığı ilə bu təşkilatın Azərbaycana gəlmiş nümayəndə heyəti səfərinin yekunlarından və ölkə rəhbərliyi ilə apardığı danışıqlardan, müxtəlif nazirliklərdə, elm-istehsalat birliklərində keçirdiyi görüşlərdən razıdır. Odlinq-Smi BVF missiyasının səfərinin yekunlarına dair mətbuat konfransında bildirmişdir ki, səfərdən əsas məqsəd dövlət banklarının özəlləşdirilməsi və enerji daşıyıcılarının qiymətlərinin dünya qiymətlərinə uyğunlaşdırılması məsələlərini müzakirə etmək idi. Bu məsələlərdə müəyyən ləngimə hiss olunur. Lakin o vurğulamışdır ki, yaxın həftələrdə hökumət bu sahədə öz təkliflərini verəcəkdir.
Hazırda Azərbaycanda BVF-nin krediti ilə yoxsulluğun azaldılmasına dair üçillik proqram həyata keçirilir. BVF-nın nümayəndəsi hökumətin və Milli Bankın bu istiqamətdə gördüyü tədbirləri müsbət qiymətləndirmiş və bildirmişdir ki, lazımi makroiqtisadi göstəricilər əldə edilmişdir. Nümayəndə heyəti səfərin gedişində ölkə hökuməti ilə bu proqram çərçivəsində gələn il üçün fəaliyyətin müxtəlif cəhətlərini müzakirə etmişdir.
Con Odlinq-Smi Dövlət Neft Fondunun fəaliyyətini də yüksək qiymətləndirmişdir.
Bölmənin digər xəbərləri
